ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ ސަރުކާރުން ތަރައްޤީގެ މަޝްރޫޢުތައް ކުރިއަށް ގެންދިއުމުގައި ސިޔާސީ ވިސްނުމަށް ބުރަނުވާނެ ކަމަށެވެ. އަދި ސަރުކާރުގެ އަމާޒަކީ އެއްވެސް ރައްޔިތަކާމެދު ތަފާތުކުރުމެއްނެތި، ރައްޔިތުންނަށް ވެފައިވާ ވަޢުދުތައް ފުއްދުން ކަމުގައި އެމަނިކުފާނު ހާމަކުރެއްވިއެވެ.
ރައީސް މިހެން ވިދާޅުވީ ތިލަދުންމަތީ ދެކުނުބުރީގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ހދ. ކުޅުދުއްފުށީ ރައްޔިތުންނާ ބައްދަލުކުރެއްވުމުގައެވެ.
މި ބައްދަލުވުމުގައި ރައީސް ވިދާޅުވީ، ސަރުކާރުގެ މަސައްކަތްތައް އަމާޒުކުރެވިފައިވަނީ ރައްޔިތުން ބާރުވެރިކުރުވައި، ރައްޔިތުން އެދޭ ތަރައްޤީއަށް ވާޞިލުވުމަށް ކަމަށެވެ. މިގޮތުން، ލާމަރުކަޒީ ޤާނޫނަށް ގެނެވުނު އިޞްލާޙުތަކަކީވެސް ރައްޔިތުން ބާރުވެރިކުރުވުމަށް އަމާޒުކޮށްގެން ގެނެވުނު ބަދަލުތަކެއް ކަމުގައި އެމަނިކުފާނު ފާހަގަކުރެއްވިއެވެ. އަދި މި އިޞްލާޙުތަކުގެ މަޤްޞަދަކީ ލާމަރުކަޒީ ނިޒާމު އިތުރަށް ހަރުދަނާކޮށް، ހެޔޮވެރިކަމެއް ޤާއިމުކުރުމާއެކު، ކައުންސިލްތަކުގެ ޒިންމާދާރުކަން އިތުރުކުރުން ކަމުގައިވެސް ވިދާޅުވިއެވެ.
ރައީސުލްޖުމްހޫރިއްޔާ އިތުރަށް ފާހަގަކުރެއްވި ގޮތުގައި، ކުރީގެ ސަރުކާަރުކާރުތަކާ ޚިލާފަށް، މިިހާރުގެ ސަރުކާރުން ކައުންސިލްތަކުގެ މަސައްކަތްތަކަށް ހުރަސްނާޅާނެއެވެ. އެމަނިކުފާނުގެ އަމިއްލަ ތަޖުރިބާއަށް ރިޢާޔަތްކުރައްވައި، މޭޔަރެއްގެ ހައިސިއްޔަތުން ކުރިމަތިވި ގޮންޖެހުންތަކުގެ ސަބަބުން، އެފަދަ ކަންކަން ތަކުރާރުވިޔަ ނުދިނުމަށް އަޒުމް ކަނޑައަޅުއްވާފައިވާ ކަމަށް ވިދާޅުވިއެވެ.
ކިޔުންތެރިންގެ ހިޔާލު