ސިންގަޕޫރުގެ އާބަން ރިޑެވެލޮޕްމަންޓް އޮތޯރިޓީ އަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ޒިޔާރަތްކުރައްވައިފި އެވެ.

އެމަނިކުފާން ސިންގަޕޫރަށް ކުރައްވާ ދަތުރުފުޅުގައި އާބަން ރިޑެވެލޮޕްމަންޓް އޮތޯރިޓީ އަށް ވަޑައިގަތުމުން އެމަނިކުފާނަށް މަރުހަބާ ދެންނެވީ އެ އޮތޯރިޓީގެ ޑެޕިއުޓީ ސީއީއޯ އަދި ޗީފް ޕްލޭނަރ އެޑޭލް ޓޭން ޝިއާއޯ ލިން ސިންގަޕޫރުގެ ހައުސިން އެންޑް ޑިވެލޮޕްމަންޓް ބޯޑުގެ ޑިރެކްޓަރ ޕޮލިސީ ސިއާ ޒެ މިންގް އެވެ.

ސިންގަޕޫރުގެ އާބަން ރިޑެވެލޮޕްމަންޓް އޮތޯރިޓީ އަށް ރައީސް ވަޑައިގަތުމުން އެމަނިކުފާނާއި އަަރިހުގައި ވަޑައިގަތް ވަފުދުގެ ބޭފުޅުންނަށް ވަނީ ދެމެހެއްޓެނިވި ސިޓީއެއްގެ ގޮތުގައި ސިންގަޕޫރު ތަރައްގީ ކުރި ގޮތުގެ ޕްރެޒެންޓޭޝަނެއް ދީފަ އެވެ. އަދި ރައީސްގެ ވަފުދުގެ ބޭފުޅުންގެ ސުވާލުތަކަށް ވަނީ ޖަވާބު ދީފަ އެވެ.

އޭގެ ފަހުން ރައީސް އާއި އެމަނިކުފާނުގެ އަރިހުގައި ވަޑައިގެންނެވި ވަފުދުގެ ބޭފުޅުންނަށް ވަނީ ސިންގަޕޫރުގެ އާބަން ރިޑެވެލޮޕްމަންޓް އޮތޯރިޓީގެ ސިޓީ ގެލެރީ ދައްކާލައިފަ އެވެ.