އެމެރިކާގެ ވޮޝިންޓަންގައި ބަޑީގެ ހަމަލާތަކެއްދީ އިސްރާއީލު ދެމީހުން މަރާލުމުން “ސިހުން” ލިބިފައިވާ ކަމަށް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނެފިއެވެ.
ނަތަންޔާހޫ ބުނީ، މިއީ އިސްރާއީލާމެދު ދުނިޔޭގައި ފަތުރަމުންދާ “ނަފްރަތުގެ” ނަތީޖާ ކަމަށެވެ.
ބަޑީގެ ހަމަލާ ދީފައިވަނީ ވޮޝިންޓަންގައި ހުންނަ ކެޕިޓަލް ޖޫއިޝް މިއުޒިއަމްގެ ބޭރުގައެވެ. ބަޑީގެ ހަމަލާގައި މަރުވެފައިވަނީ އެމެރިކާގައި ހުންނަ އިސްރާއީލު އެމްބަސީގެ ދެ މުވައްޒަފުންނެވެ.
މިއުޒިއަމްގެ ބޭރުގައި ބަޑީގެ ހަމަލާ ދީފައިވަނީ އެމެރިކާގެ ޗިކާގޯއަށް ނިސްބަތްވާ އުމުރުން 30 އަހަރުގެ މީހެކެވެ. ފުލުހުން މިހާރުވަނީ ހަމަލާދިނުމާއެކު ވަގުތުން އޭނާ ހައްޔަރު ކޮށްފައެވެ. އޭނާގެ ނަމެއް ކަމަށް ބުނެފައިވަނީ އެލައިސް ރޮޑްރިގުއާޒްއެވެ.
އޭނާއަކީ ކުރިން ކުށުގެ އެއްވެސް ރެކޯޑެއްއޮތް މީހެއް ނޫންކަމަށް ފުލުހުން ބުނެފައި ވެއެވެ.
އެލައިސް ރޮޑްރިގުއާޒް، ބަޑީގެ ހަމަލާދިން ސަބަބެއް އަދި ވަނީ ނޭނގިފައެވެ. ނަމަވެސް، ބަޑީގެ ހަމަލާއަށްފަހު އޭނާ ހައްޔަރުކޮށްގެން ގެންދިޔަވަގުތު “ފަލަސްތީނުގެ މިނިވަންކަމަށް” ގޮވަމުންދިޔަ ކަމަށް، މީޑިއާއިން ރިޕޯޓްކޮށްފައި ވެއެވެ.
ބަޑީގެ ހަމަލާ ކުށްވެރި ކުރައްވައި އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، މިއީ،، ޔަހޫދީންނާމެދު ނަފްރަތު އުފެއްދުމަށް ކުރެވޭ މަސައްކަތްތަކުގެ ނަތީޖާ ކަމަށެވެ.
ހަމަ އެއާއެކު، ނަފްރަތާއި ހަރުކަށި ފިކުރަށް އެމެރިކާގައި އެއްވެސް ޖާގައެއް ނުދެއްވާނޭ ކަމަށްވެސް ޓްރަމްޕް ވިދާޅުވިއެވެ.
އިސްރާއީލުން އެމެރިކާއަށް ކަނޑައަޅާފައި ހުންނަ އެމްބަސެޑަރު ބުނެފައިވަނީ ” އެމެރިކާގެ ޔަހޫދީ އާބާދީއަށް ގެއްލުން ދިނުމަކީ ރަތް ރޮނގު ހުރަސްކުރުން” ކަމަށެވެ.
