އެސްޓޯނިއާގެ ރައީސް އަލާރ ކާރިސްގެ ދަޢުވަތަކަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އެ ގައުމަށް ރަސްމީ ދަތުރުފުޅެއް މި މަހު 13 އިން 16 އަށް ކުރައްވާ ގޮތަށް ހަމަޖައްސަވައިފި އެވެ.
ރައީސް މުއިޒް މި ކުރައްވާ ދަތުރުފުޅަކީ ރާއްޖޭގެ ވެރިކަމުގައި ހުންނަވާ ރައީސަކު އެސްޓޯނިއާ އަށް ކުރައްވާ ފުރަތަމަ ދަތުރުފުޅު އެވެ. މިއަންނަ ހޯމަ ދުވަހު ރައީސް ފައްޓަވާ މި ދަތުރުފުޅުގައި ދެ ގައުމުގެ ގުޅުން އިތުރަށް ބަދަހިކޮށް ޑިޖިޓަލް، ސައިބަރ އަދި އީ-ގަވަނަންސްގެ ދާއިރާ އިން އެއްބާރުލުން އިތުރު ކުރެއްވުމާ ގުޅޭ ގޮތުން މަޝްވަރާ ކުރައްވާނެކަމަށް މައުލޫމާތު ލިބެއެވެ. މީގެ އިތުރުން ތިމާވެއްޓާއި ތަޢުލީމް އަދި ސައެންސްގެ ދާއިރާ އިން ރާއްޖެ އާއި އެސްޓޯނިއާއާ ދެމެދު އެއްބާރުން އިތުރު ކުރުމަށް ވެސް މަޝްވަރާ ކުރައްވާ ގޮތަށް ހަމަޖެހިފައިވެއެވެ.
އުތުރު ޔޫރަޕުގެ ގައުމެއް ކަމަށްވާ އެސްޓޯނިއާ އަކީ ޑިޖިޓަލް އިގްތިސާދެއް ޤާއިމްކޮށްފައިވާ ޓެކްނޮލޮޖީގެ ރޮނގުން ކުރިއަރަމުންއަންނަ ގައުމެކެވެ. ޚާއްސަކޮށް، ޑިޖިޓަލް ގަވަނަންސްގެ ދާއިރާ އިން އެ ގައުމަކީ ދުނިޔޭގައި ފާހަގަ ކުރެވޭ ޤައުމެކެވެ.
ރާއްޖޭގައި ޑިޖިޓަލް އިޤްތިސާދެއް ގާއިމްކުރުމަކީ ރައީސް ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދުފުޅެއްވެސްމެއެވެ.
