މި ސީޒަނުގައި ޖޫލިއަން އަލްވަރޭޒް ކާމިޔާބުކޮށްދިން ފުރަތަމަ ލަނޑުން، ޔުއެފާ ޗެމްޕިއަންސް ލީގުގައި ރޭ ޖަރުމަނުގެ ސްޓްޓްގާޓާ ދެކޮޅަށް ކުޅުނު މެޗުން އެތްލެޓިކޯ މެޑްރިޑް 1-1 އިން އެއްވަރުވެ، ޕޮއިންޓެއް ހޯދައިފިއެވެ. އެތްލެޓިކޯއިން މި ޕޮއިންޓް ކަށަވަރުކުރީ މެޗުގެ ފަހުބައި އެއް ކުޅުންތެރިއަކު މަދުކޮށް ކުޅެގެންނެވެ.

ސްޓްޓްގާޓްގެ ދަނޑުގައި ކުޅުނު މި މެޗުގެ ފުރަތަމަ ހާފު ކޮންޓްރޯލްކޮށް، މެޗުގެ ލީޑު ނެގީ އެ ޓީމުންނެވެ. އެގޮތުން މެޗުގެ 36 ވަނަ މިނެޓުގައި އެ ޓީމަށް ލީޑު ނަގައިދިނީ ޖޭމީ ލެވެލިންގއެވެ. ނަމަވެސް، ދެވަނަ ހާފު ފެށިގެން އެންމެ 80 ސިކުންތުގެ ތެރޭގައި އެތްލެޓިކޯއަށް ނަތީޖާ ހަމަހަމަކޮށްދިނީ އާޖެންޓީނާގެ ފޯވާޑް އަލްވަރޭޒެވެ.

މިއީ ވާދަވެރި ބާސެލޯނާއަށް ބަދަލުވާން ކުރި މަސައްކަތް ކާމިޔާބުނުވެ، ކްލަބާއެކު އުފެދުނު ނުތަނަވަސްކަމަށްފަހު، މި ސީޒަނުގައި އަލްވަރޭޒް އެތްލެޓިކޯއަށް ޖަހައިދިން ފުރަތަމަ ލަނޑެވެ.

އިޝްތިހާރު އިޝްތިހާރު

ދެވަނަ ހާފުގައި އެތްލެޓިކޯއިން މެޗުގެ ކޮންޓްރޯލް ހޯދައި އިތުރު ލަނޑެއް ޖެހުމަށް މަސައްކަތް ކުރަމުން ދަނިކޮށް، އެ ޓީމަށް ބޮޑު ގޮންޖެހުމަކާ ކުރިމަތިލާން ޖެހުނީ މެޗުގެ 64 ވަނަ މިނެޓުގައެވެ. އެއީ ސްޓްޓްގާޓްގެ އެންޖެލޯ ސްޓިލާއަށް ކުރި ނުރައްކާތެރި ފައުލަކާ ގުޅިގެން މޯޓެން ހުލްމަންޑަށް ރެފްރީ ސީދާ ރަތްކާޑު ދެއްކުމުންނެވެ.

މި ކާޑާއެކު މެޗުގެ ބާކީ އޮތް 26 މިނެޓު އެތްލެޓިކޯއިން ކުޅެން ޖެހުނީ 10 ކުޅުންތެރިންނާއެކުގައެވެ. ނަމަވެސް އެ ޓީމުން ވަނީ ޑިފެންސް ވަރުގަދަކޮށް، ސްޓްޓްގާޓް އިތުރު ލަނޑެއް ޖެހިޔަނުދީ ހިފަހައްޓާފައެވެ.

މި މެޗުގެ ކުރިން މި ސީޒަނުގެ ޗެމްޕިއަންސް ލީގުގައި ކުޅުނު ފުރަތަމަ ދެ މެޗުވެސް ކާމިޔާބުކޮށްފައިވަނީ ސްޓްޓްގާޓުންނެވެ.