ރާއްޖެއަށް ބޭނުންވާ މުހިންމު ކާބޯތަކެތީގެ ބާވަތްތައް ރާއްޖޭގައި އުފައްދައި، ބާޒާރަށް ނެރެވޭނެ މަގު ތަނަވަސްކޮށްދިނުމަކީ ސަރުކާރުގެ މުހިންމު އަމާޒެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިއަދު ފާހަގަކުރަމުންދާ ޤައުމީ ދަނޑުވެރިންގެ ދުވަހުގެ މުނާސަބަތުގައި ސޯޝަލް މީޑިއާ މެދުވެރިކުރައްވައި ފޮނުއްވި ތަހުނިޔާގެ މެސެޖުގައި ރައީސުލްޖުމްހޫރިއްޔާ ވަނީ، ރާއްޖޭގެ ދަނޑުވެރިންނަށާއި އެ ފަރާތްތަކުގެ ޢާއިލާތަކަށް އަދި މި ދާއިރާގައި ހަރަކާތްތެރިވާ އެންމެހައި ފަރާތްތަކަށް ދުވަހުގެ ހެޔޮއެދުންތައް އަރިސްކުރައްވާފައެވެ.
ރައީސުލްޖުމްހޫރިއްޔާގެ މެސެޖުގައި ފާހަގަކުރެއްވި ގޮތުގައި، ދަނޑުވެރިންގެ ދުވަހަކީ ޤައުމީ ފެންވަރުގައި ކާބޯތަކެތީގެ ރައްކާތެރިކަން ކަށަވަރުކުރުމަށާއި، އިޤުތިޞާދު ސިންދަފާތު ކުރުމަށްޓަކައި ހީވާގި ދިވެހި ދަނޑުވެރިން އަދާކުރާ އަގުހުރި ދައުރު ވަޒަންކޮށްދޭ މުހިންމު މުނާސަބަތެކެވެ. އަދި ބޭރުން އެތެރެކުރާ މިންވަރު މަދުކޮށް، ތިމާވެށްޓާ ރައްޓެހި އުސޫލުތަކުގެ މަތިން އަމިއްލަ ފަސްގަނޑުގައި ކާބޯތަކެތި ހެއްދުމަކީ ޤައުމުގެ އިސްތިޤުލާލާ ވެސް ސީދާ ގުޅިފައިވާ ކަމެއްކަން އެމަނިކުފާނު ފާހަގަކުރެއްވިއެވެ.
ދުނިޔޭގެ ބާޒާރުގައި ކާބޯތަކެތީގެ އަގުތަކަށް އަންނަ ބަދަލުތަކާއި، މުދާ އުފުލުމުގައި ދިމާވާ ދަތިތަކުން ސަލާމަތްވުމަށްޓަކައި، ރާއްޖޭގައި އަމިއްލައަށް ކާބޯތަކެތި އުފެއްދުން އިތުރުކުރަންޖެހިފައިވާ ކަމަށް ރައީސް ވިދާޅުވިއެވެ. މީގެއިތުރުން، މި ސިނާއަތް ފުޅާވުމަކީ ރާއްޖެއިން ބޭރުވާ ބޭރު ފައިސާ ހިފެހެއްޓި، ރަށްރަށުގައި ވަޒީފާގެ ފުރުޞަތުތައް ފަހިވެގެންދާނެ ކަމެއް ކަމުގައިވެސް އެމަނިކުފާނު ވިދާޅުވިއެވެ.
ސަރުކާރުގެ ސިޔާސަތުތަކަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ، ކަނޑައެޅޭ ވަކި ބާވަތްތަކެއް ބޭރުން އެތެރެނުކޮށް، ރާއްޖެއަށް ބޭނުންވާ މިންވަރަށް އުފެއްދޭނެ އިންތިޒާމު ހަމަޖައްސައިދިނުމަކީ ސަރުކާރުގެ ޢަޒުމެއް ކަމަށެވެ. އަދި ޒަމާނީ ޓެކްނޮލޮޖީގެ އެހީގައި ދަނޑުވެރިންނަށް ލިބޭ އާމްދަނީ އިތުރުކޮށްދީ، މި ދާއިރާއިން ކުރިއަށްދެވޭނެ މަގުފަހިކޮށްދިނުމުގެ މަސައްކަތް މެދުކެނޑުމެއްނެތި ކުރިއަށްދާނެ ކަމުގެ ޔަޤީންކަން ވެސް އެމަނިކުފާނު ދެއްވިއެވެ.
ދިވެހިރާއްޖޭގައި ޤައުމީ ދަނޑުވެރިންގެ ދުވަސް ރަސްމީކޮށް ފާހަގަކުރަން ފަށާފައިވަނީ 2009 ވަނަ އަހަރުގައެވެ. ކޮންމެ އަހަރަކުވެސް ކުލަގަދަކޮށް މި ދުވަސް ފާހަގަކުރަމުން އަންނައިރު، މިއަހަރު ފާހަގަކުރެވެނީ 17 ވަނަ ޤައުމީ ދަނޑުވެރިންގެ ދުވަހެވެ. މިއަހަރުގެ ދުވަހުގެ ޝިޢާރަކަށް ކަނޑައަޅާފައިވަނީ “އީޖާދުން، މާދަމާގެ ދިރުން” މިއެވެ.
ކިޔުންތެރިންގެ ހިޔާލު