ޔޫއެފާ ޗެމްޕިއަންސް ލީގުގެ ލީގު ފޭސްގައި ރޭ އިޓަލީގެ ސެންސީރޯ ސްޓޭޑިއަމްގައި ކުޅުނު ފޯރިގަދަ މެޗުން، އިޓާލިއަން ސެރީއާގެ ޗެމްޕިއަން އިންޓަރ މިލާންގެ މައްޗަށް ބެލްޖިއަމްގެ ކްލަބް ބްރޫޖުން 4-3 ގެ ނަތީޖާއަކުން ކުރި ހޯދައިފިއެވެ. ގިނަ ލަނޑުތަކެއް ފެނިގެންދިޔަ މި މެޗުގައި ކްލަބް ބްރޫޖްގެ ނިކޮލޯ ޓްރެސޮލްޑީ ވަނީ މޮޅު ކުޅުމެއް ދައްކައި، ހެޓްރިކް ފުރިހަމަކޮށްފައެވެ.
އިންޓަރއިން ގިނަ ވަގުތު ބޯޅަ ހިފަހައްޓައި، ގިނަ ހަމަލާތަކެއް އުފެއްދި ނަމަވެސް، މެޗުގެ 30 ވަނަ މިނިޓުގައި ލިބުނު ޕެނަލްޓީއަކުން ޓްރެސޮލްޑީ ވަނީ ބްރޫޖަށް ލީޑު ނަގައިދީފައެވެ. އެހެންނަމަވެސް، ފުރަތަމަ ހާފު ނިމެން މިނިޓަކަށް ވެފައިވަނިކޮށް ކެޕްޓަން ލައުޓާރޯ މާޓިނޭޒް ވަނީ މި ސީޒަނުގެ މުބާރާތުގައި އޭނާގެ ފުރަތަމަ ލަނޑު ޖަހައި، އިންޓަރއަށް ނަތީޖާ ހަމަހަމަކޮށްދީފައެވެ.
ދެވަނަ ހާފުގައި ބްރޫޖުން އަލުން ކުރި ހޯދީ މެޗުގެ 63 ވަނަ މިނިޓުގައެވެ. މިއީ އިންޓަރގެ ކީޕަރު ޖޯސެޕް މާޓިނޭޒްއަށް ހެދުނު ބޮޑު ގޯހެއްގެ ފައިދާ ނަގައިގެން ޓްރެސޮލްޑީ ކާމިޔާބުކުރި ލަނޑެކެވެ. އަދި އޭގެ 11 މިނިޓު ފަހުން، ޓްރެސޮލްޑީ ވަނީ އިތުރު ލަނޑެއް ޖަހައި އޭނާގެ ހެޓްރިކް ފުރިހަމަކޮށްފައެވެ.
މެޗުގެ 81 ވަނަ މިނިޓުގައި މާޓިނޭޒް އިންޓަރގެ ދެވަނަ ލަނޑު ޖަހައި ފަރަގު ކުޑަކުރި ނަމަވެސް، 87 ވަނަ މިނިޓުގައި ރޯމިއޯ ވާމެންޓް ޖެހި ލަނޑާއެކު ބްރޫޖުން ވަނީ ނަތީޖާ 4-2 އަށް ބަދަލުކޮށްލާފައެވެ. މެޗުގެ އިތުރު ވަގުތުގެ ތިންވަނަ މިނިޓުގައި ލިބުނު ޕެނަލްޓީއަކުން އެންޖެ-ޔޮއާން ބޮނީ އިންޓަރއަށް ތިންވަނަ ލަނޑު ޖަހައިދިން ނަމަވެސް، ނަތީޖާ އެއްވަރުކުރާނެ ވަގުތެއް އެ ޓީމަކަށް ނުލިބުނެވެ.
މި ނަތީޖާއާއެކު މި ސީޒަނުގެ ޗެމްޕިއަންސް ލީގުގައި ކުޅުނު ދެ މެޗުންވެސް އިންޓަރ މިވަނީ ބަލިވެފައެވެ. މިއީ މިދިޔަ ސީޒަނުގެ ނަތީޖާތަކާއެކު މި މުބާރާތުގައި އެ ޓީމު ޖެހިޖެހިގެން ބަލިވި ހަތަރުވަނަ މެޗެވެ. ޕޮއިންޓެއް ނުލިބި އިންޓަރ މިވަގުތު ތާވަލުގެ 28 ވަނައިގައި އޮތްއިރު، މުހިންމު މި މޮޅާއެކު ކްލަބް ބްރޫޖް ވަނީ 3 ޕޮއިންޓާއެކު ތާވަލުގެ 18 ވަނައަށް ޖެހިލާފައެވެ.
ކިޔުންތެރިންގެ ހިޔާލު