ޔުއެފާ ޗެމްޕިއަންސް ލީގުގައި ރޭ، ސްޕެއިނުގެ ކްލަބުތަކުން ތާރީޚީ އަދި ފާހަގަކޮށްލެވޭ މޮޅުތަކަކާއެކު ޔޫރަޕްގެ މައިދާނުގައި އެ ޤައުމުގެ ބާރުގަދަކަން ދައްކާލައިފިއެވެ. މިގޮތުން އަންގާރަ ދުވަހުގެ ރޭ ކުޅުނު މެޗުތަކުގައި ވާދަކުރި ސްޕެއިނުގެ ތިން ކްލަބު ކަމަށްވާ ބާސެލޯނާ، އެތުލެޓިކޯ މެޑްރިޑް އަދި ވިޔަރެއާލް ވަނީ ބޮޑު ތަފާތަކުން މޮޅުވެފައެވެ.
މި މެޗުތަކުގައި ވާދަކުރި ސްޕެއިނުގެ ކޮންމެ ޓީމަކުންވެސް ވަނީ މަދުވެގެން ދެ ލަނޑުގެ ތަފާތުން މޮޅުވެފައެވެ. މިއީ ޗެމްޕިއަންސް ލީގުގެ ދިގު ތާރީޚުގައިވެސް ސްޕެއިނުގެ ޓީމުތަކަށް ވަރަށް ނާދިރު ކާމިޔާބީއެކެވެ. ރަށުން ބޭރުގައި ކުޅުނު މެޗުގައި ބާސެލޯނާއިން ވަނީ 4-1 ގެ ބޮޑު ނަތީޖާއަކުން ގަލަޓަސަރާއީ ބަލިކޮށްފައެވެ. މީގެއިތުރުން، އަމިއްލަ ދަނޑުގައި އެތުލެޓިކޯ މެޑްރިޑުން ވަނީ 2-0 އިން ވަރުގަދަ މެންޗެސްޓާ ޔުނައިޓެޑް ބަލިކޮށްފައެވެ. އަދި ވިޔަރެއާލުން ވަނީ އިޓަލީގެ ނަޕޯލީގެ މައްޗަށް 3-1 އިން ކުރިހޯދާފައެވެ.
ފުޓްބޯޅައިގެ ހިސާބުތަކާއި ތަފާސްހިސާބުތައް ދިރާސާކުރާ މަޝްހޫރު ތަޖުރިބާކާރު “މިސްޓަރ ޗިޕް” ހާމަކުރި ގޮތުގައި، ޗެމްޕިއަންސް ލީގުގެ ތާރީޚުގައި އެއް ދުވަހެއްގައި ސްޕެއިނުގެ ތިން ކްލަބަކުން މަދުވެގެން ދެ ލަނޑުގެ ތަފާތުން މޮޅުވެފައިވަނީ މީގެ ކުރިން އެންމެ ފަހަރަކުއެވެ. އެއީ މީގެ 10 އަހަރު ކުރިން، 15 ސެޕްޓެމްބަރު 2015 ގައެވެ.
އެ ދުވަހު ރެއާލް މެޑްރިޑުން ވަނީ 4-0 އިން ޝަޚްތަރު ޑޮނެޓްސްކް ބަލިކޮށްފައެވެ. އަދި ސެވިއްޔާއިން 3-0 އިން ބޮރޫޝިއާ މޮންޗެންގްލަޑްބަކް ބަލިކުރިއިރު، އެތުލެޓިކޯ މެޑްރިޑުން ވަނީ ރަށުން ބޭރުގައި 2-0 އިން ގަލަޓަސަރާއީ ބަލިކޮށްފައެވެ.
މި ތާރީޚީ ކާމިޔާބީއަށް ދިހަ އަހަރު ފުރުނުއިރު، ލަ ލީގާގެ ޓީމުތަކުން މިވަނީ އަނެއްކާވެސް އެފަދަ ފުރިހަމަ ކާމިޔާބީއެއް ތަކުރާރުކޮށް، ޔޫރަޕްގެ ފުޓްބޯޅައިގައި އެ ޤައުމުގެ ކްލަބުތަކުގެ ހައިބަތު އަލުން ސާބިތުކޮށްދީފައެވެ.
ކިޔުންތެރިންގެ ހިޔާލު