ޚާރިޖީ ވުޒާރާއާއި މުވައްޒަފުންނާ ގުޅޭގޮތުން ސާބިތުނުވާ މަޢުލޫމާތު އާންމު ނުކުރުމަށް އިލްތިމާސް ކޮށްފި އެވެ.
ދިވެހި ޚާރިޖިއްޔާއިން އެކަމަށް އިލްތިމާސް ކޮށްފައިވަނީ ޕީއެންސީއަށް ސޮއިނުކުރެއްވުމުން ސަފީރަކު މަގާމުން ވަކި ކުރެއްވި ކަމަށް ވިދާޅުވެ، ނޫހެއްގައި ޝާއިޢުކޮށްފައިވާ ޚަބަރެއް ސަމާލުކަމަށް އައުމާއި ގުޅިގެން އެކަން ސާފުކޮށްދީ ނެރުނު ބަޔާނެއްގަަ އެވެ.
އެ ވުޒާރާއިން ބުނީ މި ޚަބަރަކީ ހަޤީގަތާ ޚިލާފު ޚަބަރެއް ކަމަށެވެ.
ސަފީރުން މަގާމަށް އައްޔަނުކުރުމާއި މަގާމުން ވަކިކުރުމަކީ ދިވެހިރާއްޖޭގެ ފޮރިން ސާރވިސް ޤާނޫނުގެ ދަށުން، ވަކި އުޞޫލުތަކެއްގެ މަތީން ހިނގަމުންދާ ކަމެއް ކަމަށާ އެގޮތުގެ މަތީން، ސަފީރުން ވަކި ކުރުމުގެ ނިންމުންތައް ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން ނިންމަވަމުންދާނެ ކަމަށް ވެސް ބުނެފައިވެ އެވެ.
ނޫހަކުން ފެތުރި ޚަބަރުގައި ފާހަގަކޮށްފައިވާ ސަފީރަކީ 3 ޖެނުއަރީ 2024 އިން ފެށިގެން އެމްބެސެޑަރ އެޓް ލާރޖްގެ ގޮތުގައި ސްޓޭޓް މިނިސްޓަރުންގެ ފެންވަރުގައި ޚާރިޖީ ވުޒާރާގެ ސިޔާސީ މަގާމެއްގައި ހުންނެވި ބޭފުޅެއް ކަމަށާ އަދި ސަފީރެއްގެ ގޮތުގައި އައްޔަނު ކުރައްވާފައިވަނީ 30 އޮކްޓޯބަރ 2024 ގައި ކަމަށް ވެސް ބުނެފައިވެ އެވެ.
ޚާރިޖީ ވުޒާރާއިން ބުނީ ފޮރިން ސާރވިސްގެ މުވައްޒަފުންނަށް ފޮރިން ސާރވިސްގެ ކޯޑް އޮފް ކޮންޑަކްޓްގެ ދަށުން ސިޔާސީ ޕާޓީއެއްގެ މެންބަރެއްގެ ގޮތުގައި ނުހުރެވޭނެ ކަމަށާ އެގޮތުގެ މަތީން، ފޮރިން ސާރވިސްގެ މުވައްޒަފުން ޤާނޫނާ ޚިލާފަށް ސިޔާސީ ޕާޓީއަކަށް ސޮއިކުރުމަށް ސަރުކާރުން މަޖުބޫރު ކޮށްފައި ނުވާނެ ކަމަށެވެ.
އެހެން ކަމުން ޚާރިޖީ ވުޒާރާއާއި މުވައްޒަފުންނާ ގުޅޭގޮތުން ސާބިތުނުވާ މަޢުލޫމާތު އާންމު ނުކުރުމަށް ވަނީ އިލްތިމާސް ކޮށްފަ އެވެ.
ކިޔުންތެރިންގެ ހިޔާލު