ހުޅުމާލޭގެ ސޯޝަލް ހައުސިންގ ޔުނިޓްތަކުގެ ތެރެއިން 50 އިންސައްތަ ފްލެޓުން ގަވާއިދުން ކުލި ނުދައްކާ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިންގ ޑިރެކްޓަރ އަލީ ޒުހައިރު ވިދާޅުވެއްޖެއެވެ.
ދިވެހިރާއްޖޭގެ އަޑުން ފޮނުވި “އަހާށޭ ބުނާނަން” ޕްރޮގްރާމުގައި ވާހަކަދައްކަވަމުން އަލީ ޒުހައިރު ވިދާޅުވީ، ހުޅުމާލޭގައި އެ ކުންފުނީގެ ބެލުމުގެ ދަށުގައި 12،000 އަށް ވުރެ ގިނަ ފްލެޓް އެބަހުރި ކަމަށެވެ. ނަމަވެސް އެކި ސަބަބުތަކާ ހުރެ، ޚާއްޞަކޮށް މާލީ ދަތިތަކާ ގުޅިގެން މީގެ ތެރެއިން ގާތްގަނޑަކަށް ދެބައިކުޅައެއްބައި ފަރާތްތަކުން ކުލި ނުދައްކާ ކަމަށް އޭނާ ފާހަގަކުރެއްވިއެވެ.
އަލީ ޒުހައިރު އިތުރަށް ވިދާޅުވި ގޮތުގައި، ހުޅުމާލޭގައި ތަރައްޤީކޮށްފައިވާ 172 މަޝްރޫޢެއްގެ ތެރެއިން ސެމީ ލަގްޒަރީ އަދި ލަގްޒަރީގެ 12،831 އެޕާޓްމަންޓް މިހާރުވެސް އެބަހުއްޓެވެ. މީގެ އިތުރުން ސެމީ ލަގްޒަރީގެ 1،763 ޔުނިޓާއި ލަގްޒަރީގެ 1،400 ޔުނިޓް ތަރައްޤީ ކުރުމުގެ މަސައްކަތް މިހާރުވެސް ދަނީ ކުރިއަށެވެ.
ސޯޝަލް ހައުސިންގ ފްލެޓްތައް ނަހަމަ ގޮތުގައި ކުއްޔަށް ދިނުމުގެ މައްސަލައަށް އަލިއަޅުއްވާލައްވަމުން އެމްޑީ ވިދާޅުވީ، ބޭރު މީހުންނަށް ކުއްޔަށް ދޫކޮށްފައިވާ ކަމަށް ފާހަގަކުރެވުނު ފްލެޓްތައް ވަކި މުއްދަތެއްގެ ތެރޭގައި ހުސްކުރުމަށް އެންގި ކަމަށާއި، ގިނަ ފަރާތްތަކުން އެ އެންގުމަށް އިޖާބަދީފައިވާ ކަމަށެވެ. އަދި ޤަވާޢިދާ ޚިލާފަށް ފްލެޓް ކުއްޔަށްދޭ ފަރާތްތައް މޮނިޓަރކޮށް، އަޅަންޖެހޭ ޤާނޫނީ ފިޔަވަޅުތައް އަބަދުވެސް އަޅަމުން ގެންދާނެ ކަމުގެ ޔަޤީންކަން އޭނާ ދެއްވިއެވެ.
ހިޔާ ފްލެޓްތަކުގެ ކުލި ނުދެއްކުމުގެ ސަބަބުން އަރާފައިވާ ޖޫރިމަނާތަކާ ގުޅޭގޮތުން އެޗްޑީސީން ހާމަކޮށްފައިވާ ގޮތުގައި، ވޭތުވެދިޔަ އަހަރުތަކުގައި އަރާފައިވާ 1.9 މިލިއަނެއްހާ ރުފިޔާގެ ޖޫރިމަނާ ވަނީ މަޢާފްކޮށްދީފައެވެ. އަދި 2023 ވަނަ އަހަރު އަރާފައިވާ ޖޫރިމަނާތައްވެސް އެއްކޮށް މަޢާފްކޮށްދީފައިވެއެވެ.
ދެ ކޮޓަރީގެ ހިޔާ އެޕާޓްމަންޓްތަކުގެ މަހު ކުއްޔަކީ 3،984 ރުފިޔާއެވެ. މީގެ އިތުރުން މެއިންޓަނަންސް ފީގެ ގޮތުގައި ނަގާ 1،000 ރުފިޔާއާއެކު، ކޮންމެ އެޕާޓްމަންޓަކުން މަހަކު ދައްކަން ޖެހެނީ ޖުމްލަ 4،984 ރުފިޔާއެވެ.
ކިޔުންތެރިންގެ ހިޔާލު