ގދ. ތިނަދޫ ސިޓީގެ ދަރަޖައަށް ބަދަލުކުރުމުގެ މަރުހަލާގައި ސަރުކާރުގެ އިދާރާތަކަށް ދޮގު މައުލޫމާތު ދިން ކަމަށް ތުހުމަތުކޮށް، ތިނަދޫ ސިޓީގެ މޭޔަރު ސައުދު އަލީގެ މައްޗަށް އުފުލާފައިވާ ދައުވާތަކުން ދިފާއުވުމަށް ގާނޫނީ ވަކީލަކު އައްޔަނުކުރުމަށް ކޯޓުން 10 ދުވަހުގެ މުއްދަތެއް ދީފިއެވެ.
ޕްރޮސެކިއުޓާ ޖެނެރަލްގެ އޮފީހުން ސައުދުގެ މައްޗަށް އުފުލާފައި ވަނީ ގާނޫނުލްއުގޫބާތުގެ ދަށުން ރަސްމީ އިދާރާތަކަށް ދޮގު މައުލޫމާތު ދިނުމުގެ ދައުވާއާއި، ތަހުގީގަށް ހުރަސްއެޅުމުގެ ދައުވާއެވެ. މި މައްސަލައިގެ އިބްތިދާއީ އަޑުއެހުމެއް ބޭއްވިފައިވާއިރު، މި ދައުވާތައް ސާބިތުވެއްޖެނަމަ އޭނާގެ މައްޗަށް ޖަލު ހުކުމެއް އައުމުގެ ފުރުސަތު އޮތް ކަމަށް ޕީޖީ އޮފީހުން ބުނެފައިވެއެވެ.
ތިނަދޫއަށް ސިޓީއެއްގެ ދަރަޖަ ހޯދުމަށްޓަކައި އާބާދީގައި 10،000 މީހުން ހަމަވާކަން ދެއްކުމުގެ ގޮތުން 2020 ވަނަ އަހަރުގެ ސެޕްޓެމްބަރު މަހުގެ ހަތަރުވަނަ ދުވަހު ސައުދު ވަނީ ލޯކަލް ގަވަމެންޓް އޮތޯރިޓީއަށް މަރުވެފައިވާ މީހުންނާއި ސައްހަ ނޫން މައުލޫމާތު ހިމެނޭ ލިސްޓެއް ހުށަހަޅުއްވާފައެވެ. އެލްޖީއޭއިން ސައްހަ ލިސްޓެއް ހުށަހެޅުމަށް އެދުމުން، 2022 ވަނަ އަހަރުގެ އޯގަސްޓް މަހުގެ 23 ވަނަ ދުވަހު ފޮނުވި ލިސްޓުގައިވެސް އެހެން ރަށްރަށުގައި ރެޖިސްޓްރީވެފައިވާ މީހުންނާއި އެއް ނަންތަކެއް ތަކުރާރުކޮށް، އާބާދީއަކީ 10،000އަށްވުރެ ގިނަ މީހުން ކަމަށް ބަޔާންކޮށް އޮޅުވާލާފައިވާ ކަމަށް ޕީޖީން ތުހުމަތުކުރެއެވެ.
މީގެއިތުރުން، ފުލުހުން ކުރިއަށްގެންދިޔަ ތަހުގީގުގައި އެ ލިސްޓު ހިއްސާކޮށްދިނުމަށް އެދުމުން، އެ މައުލޫމާތު ރިކޯޑުކުރެވިފައި ނެތް ކަމަށް ބުނެ ސައުދު ފުލުހުންނަށް ދޮގު މައުލޫމާތު ދެއްވައި ތަހުގީގަށް ހުރަސްއަޅާފައިވާ ކަމަށް ވެސް ދައުވާގައި ބަޔާންކޮށްފައިވެއެވެ. މި މައްސަލައިގައި ކޯޓުން ވަނީ ދިފާއީ ވަކީލެއްގެ ފުރުސަތު ދީ، ދެން އޮންނަ އަޑުއެހުމެއްގައި ޝަރީޢަތް ކުރިއަށް ގެންދިއުމަށް ތައްޔާރުވުމަށް އަންގާފައެވެ.
ކިޔުންތެރިންގެ ހިޔާލު