ބްރެޒިލްގެ ވާދަވެރި ރިޔާސީ އިންތިޚާބުގައި އެގައުމުގެ ރައްޔިތުން ވޯޓްލަމުން އެބަ ގެންދެއެވެ.
ބްރެޒިލްގެ ގަޑިން ހެދުނު 8 ޖެހިއިރު ވޯޓްލާން ފަށާފައި ވާއިރު، ވޯޓްލުން ނިމޭނީ ހަވީރު 5 ޖަހާއިރުއެވެ. އެއީ، ޖީއެމްޓީ ގަޑިން ރޭގަނޑު 8 ޖަހާއިރުއެވެ.
ރިޔާސީ އިންތިޚާބުގައި އެންމެ ބޮޑު ވާދަވެރިކަމެއް ފެނިގެންދަނީ ބްރެޒިލްގެ މިހާރުގެ ރައީސް ލުއިޒް އިނާޝިއޯ ލޫލާ ޑަ ސިލްވާއާއި، ބްރެޒިލްގެ ކުރީގެ ރައީސް ބޮލްސޮނާރޯގެ ދަރިކަލުން އަދި ސެނެޓަރ ފްލާވިއޯ ބޮލްސޮނާރޯއާ ދެމެދުގައެވެ.
ވަރަށް ވާދަވެރި ކެމްޕެއިނަކަށްފަހު ވޯޓުލުން ފެށިގެން ކުރިއަށްދާއިރު ރައީސް ލޫލާ ވާދަ ކުރައްވަމުން ގެންދަވަނީ ވެރިކަމުގެ ހަތަރުވަނަ ދައުރަކަށެވެ.
ރިޔާސީ އިންތިޚާބުގައި ޖުމްލަ 13 ކެންޑިޑޭޓުން ވާދަކުރައްވާއިރު، ވޯޓުލުމުގެ ހައްގު ލިބިފައިވާ މީހުންގެ ދެބައިކުޅަ އެއްބަޔަށްވުރެ ގިނަ ވޯޓު އެއްވެސް ކެންޑިޑޭޓަކަށް ނުލިބިއްޖެނަމަ އެންމެ ގިނަ ވޯޓު ލިބޭ ދެ ކެންޑިޑޭޓުންގެ މެދުގައި ދެވަނަ ބުރެއް ބާއްވާނެއެވެ. ދެވަނަ ބުރަކަށް ހިނގައްޖެނަމަ ވޯޓުލުން އޮންނަނީ މިމަހުގެ 25 ވަނަ ދުވަހުއެވެ.
ބްރެޒިލްގެ މީޑިއާ ރިޕޯޓްތައް ބުނަނީ، މިހާރުގެ ރައީސް ލޫލާއަށްވެސް ރިޔާސީ އިންތިޚާބު އެއްބުރުން ކާމިޔާބު ކުރެވޭނޭ ކަމަށް ނުބެލެވޭ ކަމަށެވެ.
ނަމަވެސް އިދިކޮޅު ލީޑަރު ފްލާވިއޯ ބޮލްސޮނާރޯ އުންމީދު ކުރައްވަނީ ފުރަތަމަ ބުރުން އޭނާއަށް ރިޔާސީ އިންތިޚާބު ކާމިޔާބު ކުރެއްވޭނޭ ކަމަށެވެ.
ބްރެޒިލްގެ ރައީސް ލުއިޒް އިނާޝިއޯ ލޫލާ ޑަ ސިލްވާއަކީ ފަލަސްތީނު ރައްޔިތުންގެ ހައްގުގައި ވަރަށް ބޮޑަށް ވަކާލާތު ކުރައްވާ ބޭފުޅެކެވެ. އަދި ޣައްޒާ މައްސަލާގައި އިސްރާއީލު ވަރަށް ބޮޑަށް ކުށްވެރި ކުރައްވައި އިސްރާއީލާއި ބްރެޒިލްއާ ދެމެދު ހެދިފައި ހުރި ހަތިޔާރުގެ ވިޔަފާރީގެ އެތައް އެއްބަސްވުމެއްވެސް ކެންސަލް ކުރައްވާފައި ވެއެވެ.
އެޔާ ޚިލާފަށް ފްލާވިއޯ ބޮލްސޮނާރޯ ގެންދަވަނީ އިންތިޚާބު ކާމިޔާބު ކުރެވިއްޖެނަމަ އިސްރާއީލާއި ބްރެޒިލްގެ ގުޅުން އިތުރަށް ވަރުދަ ކުރައްވައި، ރައީސް ލޫލާ އިސްރާއީލާ ދެކޮޅަށް އެޅުއްވި ހުރިހާ ފިޔަވަޅުތަކެއް ބާތިލް ކުރައްވާނޭ ކަމަށް ވިދާޅުވަމުންނެވެ.
ފްލާވިއޯގެ ކެމްޕެއިންގެ ހުރިހާ އެއްވުންތަކުގައި އިސްތިއުމާރީ އިސްރާއީލުގެ ދިދަ ފެނިގެން ގޮސްފައި ވެއެވެ. އޭނާ ހޮވަން އެމެރިކާއިންވެސް ގަދައަޅައި މަސައްކަތް ކުރަމުން ގެންދެއެވެ.
ކިޔުންތެރިންގެ ހިޔާލު