ލިއޮނަލް މެސީ، ސްޕެއިންގެ އިތުރު ކްލަބެއް ގަނެފިއެވެ. މިފަހަރު ގަނެފައިވަނީ ސްޕެއިންގެ ދެވަނަ ޑިވިޜަންއަށް ނިސްބަތްވާ ކްލަބެއް ކަމަށްވާ ސީޑީ އެލްޑެންސްއެވެ.
މިއީ ދުނިޔޭގެ އެންމެ މޮޅު އެއް ކުޅުންތެރިޔާކަމަށްވާ އާޖެންޓީނާގެ މެސީ ސްޕެއިންގެ ކްލަބެއް ގަން ދެވަނަ ފަހަރެވެ. މީގެކުރިން މިއަހަރުގެ އެޕްރީލް މަހު މެސީވަނީ ސްޕެއިންގެ އެހެން ކްލަބެއް ކަމަށްވާ ކޯނެޔާ ގަނެފައެވެ.
ކްލަބް ޑިޕޯޓިވޯ އެލްޑެންސް ގަތުމުގެ މަރްހަލާ މެސީ ފުރިހަމަ ކޮށްފައިވާކަން އެކްލަބުންވެސް ރަސްމީކޮށްވަނީ ހާމަކޮށްފައެވެ. އަދި މިއީ ކްލަބްގެ 100 އަހަރަށްވީ ތާރީހްގައި އައު ސަފްހާއެއް ހުޅިވިގެންދާ ދުވަހެއްގެ ގޮތުގައި އެކްލަބްއިން ހާމަކޮށްފައިވެއެވެ. ސީޑީ އެލްޑެންސް އަކީ 22 ޓީމު ހިމެނޭ ސްޕެއިންގެ ދެވަނަ ޑިވިޜަންގައި މިވަގުތު 19 ވަނައިގާ އުޅޭ ކްލަބެކެވެ. އެޓީމު މިސީޒަންގައި މިހާތަނަށް ކުޅުނު 7 މެޗުގެ ތެރެއިން މޮޅުވެފައިވަނީ އެންމެ މެޗަކުންނެވެ. އަދި ލިބިފައިވަނީ 5 ޕޮއިންޓެވެ.
ސްޕެއިންގެ އެންމެ ކާމިޔާބު ދެ ކްލަބްގެ ތެރެއިން އެއް ކްލަބް ކަމަށްވާ އެފްސީ ބާސެލޯނާ ދުށް އެންމެ ފާހަގަ ކޮށްލެވޭ ކުޅުންތެރިންގެ ތެރޭގައި ހިމެނޭ މެސީ މިހާރު ކުޅެމުންދަނީ އެމެރިކާގެ މޭޖަރ ލީގު ސޮކަރގެ އެންމެ ފަހުގެ ޗެމްޕިއަން އިންޓަރ މައާމީ އަށެވެ. އަދި އާޖެންޓީނާ އާއެކު 2022 ވަނަ އަހަރު ވޯލްޑް ކަޕް ކާމިޔާބު ކޮށްފައިވާ މިކުޅުންތެރިޔާވަނީ ވަރަށް ފަހުން ޤައުމީ ޓީމަށް ކުޅުން ހުއްޓާލިކަންވެސް ހާމަކޮށްފައެވެ. ސީޑީ އެލްޑެންސް އިން ހާމަކުރިގޮތުގައި ފުޓްބޯޅައިގެ ތާރީހް ދުށް އެންމެ ފާހަގަ ކޮށްލެވޭ ކުޅުންތެރިޔާ މިކްލަބްގެ ވެރިޔާއަށް ވުން އެއީ ދިގު މުއްދަތުގެ ޕްރޮޖެކްޓެއްގެ ފެށުން ކަމަށެވެ. އުމުރުން 13 އަހަރުގައި އާޖެންޓީނާ ދޫކޮށް ސްޕެއިންއަށް ބަދަލުވި މެސީ ވަނީ 2004 ވަނަ އަހަރު އުމުރުން 17 އަހަރުގައި ބާސާއަށް ކުޅެން ފަށައިފައެވެ. އަދި އެކްލަބަށްވަނީ 778 މެޗު ކުޅެދީ 672 ލަނޑު ކާމިޔާބު ކޮށްދީފައެވެ. އަދި އެއަށްފަހު 2021 ވަނަ އަހަރު ފްރެންޗް ލީގު އާންގެ ޕެރިސް ސެއިންޓް ޖަރމެއިން އަށް ބަދަލުވެ މިހާރު ކުޅޭ މައާމީއަށް ބަދަލުވެފައިވަނީ 2023 ވަނަ އަހަރުއެވެ.
ފަހަކަށް އައިސް ފުޓްބޯޅަ ކުޅޭ ކުޅުންތެރިން ކްލަބްތައް ގަތުން ވެފައިވަނީ ވަރަށް އާންމު ކަމަކަށެވެ. މިގޮތުން މެސީގެ އިތުރުން ކްރިސްޓިއާނޯ ރޮނާލްޑޯ އާއި ކިލިއަމް އެމްބާޕޭ ފަދަ ކުޅުންތެރިންވެސް ވަނީ ފުޓްބޯޅަ ކްލަބްތައް ގަނެފައެވެ. އަދި އެންމެ ކާމިޔާބު އެއް މިސާލަކަށް މެސީ މިހާރު ކުޅެމުންދާ މައާމީވެސް ފުދެއެވެ. މިގޮތުން މިކްލަބްގެ ވެރިންގެ ތެރޭގައި އިންގްލަންޑްގެ ކުރީގެ ކުޅުންތެރިޔާ ސަރ ޑޭވިޑް ބެކަމް ހިމެނެއެވެ.
ކިޔުންތެރިންގެ ހިޔާލު