ޖަޕާނު ސަރުކާރުން ރާއްޖެއަށް ފުރަތަމަ ފަހަރަށް ރަސްމީކޮށް ސެކިއުރިޓީ އެހީތެރިކަން ފޯރުކޮށްދިނުމަށް ވިސްނަމުންދާ ކަމަށާއި، މިއީ ދެ ގައުމުގެ ދެމެދުގައި އޮތް ގުޅުން އައު ހަރުފަތަކަށް ގެންގޮސްދޭނެ މުހިންމު ފިޔަވަޅެއް ކަމަށް ޚާރިޖީ ވަޒީރު އިރުތިޝާމް އާދަމް މިއަދު ވިދާޅުވެއްޖެއެވެ.
ޚާރިޖީ ވަޒީރު މިހެން ވިދާޅުވީ ރާއްޖޭގައި ޖަޕާނުގެ އެމްބަސީ ގާއިމުކުރިތާ 10 އަހަރު ފުރުން ފާހަގަކުރުމުގެ މުނާސަބަތުގައެވެ. މިއީ ދެ ގައުމުގެ ދެމެދުގައި އޮތް އިގްތިޞާދީ އަދި އިޖުތިމާޢީ ގުޅުން އިތުރަށް ފުޅާވެގެންދާނެ ކަމެއް ކަމަށް ވަޒީރު ފާހަގަކުރެއްވިއެވެ.
މި ހަފުލާ ބޭއްވުނީ މާލޭގެ ހޮޓެލް ޖެންގައެވެ. ވަޒީރުގެ ވާހަކަފުޅުގައި، ރާއްޖެއާއި ޖަޕާނަކީ ކަނޑުގެ ސަރަޙައްދު ބޮޑު ދެ ގައުމަށް ވުމާއެކު، އިންޑޯ-ޕެސިފިކް ސަރަޙައްދުގެ އަމާންކަމާއި މިނިވަންކަން ދެމެހެއްޓުމަށް ދެ ގައުމުން ވެސް އިސްކަންދޭ ކަމަށް ވިދާޅުވިއެވެ.
ސެކިއުރިޓީ ދާއިރާއިން ޖަޕާނުން އެހީތެރިކަން ފޯރުކޮށްދޭން ނިންމުމަކީ ދެ ގައުމުގެ އެއްބާރުލުން އިތުރަށް ފުޅާވެ، ދެމެހެއްޓެނިވި ގޮތެއްގައި ގުޅުން ބަދަހިވުމަށް އެޅޭ ބާރަކަށް ވާނެ ކަމަށް ވަޒީރު ވިދާޅުވިއެވެ. މިއީ ދެ ގައުމުގެ ރައްޔިތުންގެ މެދުގައިވާ ގުޅުން އައު އުސްމިންތަކަކަށް ގެންދިއުމަށް އެޅޭ މުހިންމު ފިޔަވަޅެއްގެ ގޮތުގައިވެސް އެކަމަނާ ސިފަކުރެއްވިއެވެ.
މީގެއިތުރުން، އދ. ގެ އާންމު މަޖިލީހުގެ ހަވާސާގައި ޖަޕާނުގެ ޚާރިޖީ ވަޒީރާ ބައްދަލުކުރައްވައި، ކުރިއަށް އޮތް އަހަރުތަކުގައި ދެ ގައުމުގެ ގުޅުން އިތުރަށް ވަރުގަދަކުރުމަށް މަޝްވަރާކުރެވުނު ކަމަށް ވަޒީރު ވިދާޅުވިއެވެ. އަންނަ އަހަރަކީ ރާއްޖެއާއި ޖަޕާނާ ދެމެދު ސިޔާސީ ގުޅުން ގާއިމުކުރިތާ 60 އަހަރު ފުރޭ އަހަރު ކަމަށްވާތީ، އެ މުނާސަބަތާއެކު ދެ ގައުމުގެ ގުޅުން އިތުރު ހަރުފަތަކަށް އުފުލިގެންދާނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.
މި ހަފުލާގައި ވަޒީރު ވަނީ މާލޭގެ ބޮޑުތަކުރުފާނު މަގުގެ ތޮށިގަނޑު ހެދުމާއި، ސްކޫލްތައް ބިނާކުރުމާއި، ކާރިސާތަކުން އަރައިގަތުމަށް ޖަޕާނުން ވެދީފައިވާ އެހީތައް ޝުކުރުވެރިކަމާއެކު ފާހަގަކުރައްވާފައެވެ. ވޭތުވެދިޔަ 10 އަހަރު ދުވަހުގެ ތެރޭގައި ޖަޕާން އެމްބަސީން ކޮށްދެއްވާފައިވާ ޚިދުމަތްތަކަށް ސަފީރު އިޝިގާމީ ރުމީކޯއަށާއި އެމްބަސީގެ ޓީމަށް ވަޒީރު ޝުކުރު އަދާކުރެއްވިއެވެ.
ކިޔުންތެރިންގެ ހިޔާލު