އދ.ގެ އާންމު މަޖިލީހުގެ 81 ވަނަ ސެޝަންގެ ހައި-ލެވެލް ހަފްތާ ގައި ބައިވެރިވެވަޑައިގަތުމަށް ހާރިޖީ ވަޒީރު އިރުތިޝާމް އާދަމް ނިއުޔޯކަށް ކުރެއްވި ރަސްމީ ދަތުރުފުޅު މިއަދު ނިންމަވާލައްވައިފިއެވެ. ރާއްޖޭގެ ވަފްދުގައި އިސްކޮށް ހުންނެވީ ރައީސުލްޖުމްހޫރިއްޔާގެ ނައިބު އަލްއުސްތާޛު މުޙައްމަދު ޙުސައިން ލަޠީފް އެވެ. މި ސެޕްޓެމްބަރު މަހުގެ 22 އިން 28 އަށް އދ.ގެ މައި މަރުކަޒުގައި ކުރިއަށްދިޔަ މި ބައްދަލުވުންތަކުގައި، ރައީސުލްޖުމްހޫރިއްޔާގެ ނައިބު 25 ވަނަ ދުވަހު އދ.ގެ އާންމު ބަހުސްގައި ދެއްވި ތަގުރީރުގެ މެސެޖުތައް ކުރިއަށް ނެރުއްވައި، ރާއްޖެއިން އިސްކަންދޭ މުހިންމު ކަންކަމާ ގުޅޭގޮތުން ވަޒީރު އިރުތިޝާމް ވަނީ އެކި ބައްދަލުވުންތަކުގައި ވަކާލާތު ކުރައްވާފައެވެ.
މީގެއިތުރުން ތަރައްގީވުމުގެ ހައްގާ ބެހޭގޮތުންނާއި، ބަލިމަޑުކަމުން ރައްކާތެރިވުމާއި އެކަމަށް ތައްޔާރުވެފައި އޮތުމާ ގުޅޭގޮތުން ބޭއްވި ހައި-ލެވެލް ބައްދަލުވުންތަކުގައި، ކޮންމެ ގައުމަކަށްވެސް އެ ގައުމެއްގެ މުސްތަގުބަލު އަމިއްލައަށް ބިނާކުރުމުގެ މިނިވަންކަމާއި ފުރުސަތު ފަހިވެފައިވާ ބައިނަލްއަގުވާމީ މާހައުލެއް ގާއިމުކުރުމުގެ މުހިންމުކަމުގެ މައްޗަށް ވަޒީރު އަލިއަޅުއްވާލެއްވިއެވެ.
ވަޒީރު އިރުތިޝާމް ވަނީ ޓެކްނޮލޮޖީ ޓްރާންސްފާއާއި، ދެމެހެއްޓެނިވި ސަޕްލައި ޗެއިންތަކާއި، ފަސޭހައިން ލިބޭނޭ މާލީ އެހީތެރިކަމާއި، އެންމެން ހިމެނޭހެން ބިނާކުރެވޭ ޑިޖިޓަލް މުސްތަގުބަލެއްގެ މުހިންމުކަން ފާހަގަކުރައްވާފައެވެ. މިގޮތުން އދ. ގެ ނިޒާމަށް ގެންނަންޖެހޭ ބަދަލުތަކުގެ ތެރޭގައި، ނަތީޖާ ނެރެވޭނެ މަސައްކަތްތަކަށް އިސްކަންދިނުމާއި، ސަލާމަތީ މަޖިލީހަކީ ހުރިހާ ގައުމެއްގެ ތަމްސީލުވުން އެކުލެވޭ ތަނަކަށް ހެދުމާއި، ދުނިޔޭގެ މާލީ ނިޒާމުތައް މިހާރަށްވުރެ އިންސާފުވެރި ކުރުމަށް އެކަމަނާ ގޮވާލެއްވިއެވެ. މީގެ އިތުރުން ސުލްހަޔާއި ސަލާމަތަށްޓަކައި ވަރުގަދަ ފިޔަވަޅުތަކެއް އެޅުމަށާއި، އަންހެނުންގެ ލީޑަރޝިޕް އިތުރުކުރުމަށް ބާރުއެޅުއްވިއެވެ. އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) އަދި ޖީ-77 އާއި ޗައިނާގެ އަހަރީ ކޯޑިނޭޝަން ބައްދަލުވުންތަކުގައި، ތަރައްގީވަމުން އަންނަ ކުދި ޖަޒީރާ ގައުމުތަކުގެ (ސިޑްސް) އިސްކަންދޭ ކަންކަން ކުރިއެރުވުމަށާއި، ފަލަސްތީނުގެ ރައްޔިތުންގެ ހައްގުތައް ހިމާޔަތްކުރުމުގައި ދިވެހިރާއްޖެއިން ދެމިއޮންނާނެކަން އެކަމަނާ އަލުން ކަށަވަރުކޮށްދެއްވިއެވެ. ހައި ލެވެލް ހަފްތާގެ ތެރޭގައި، އެކި ގައުމުތަކުގެ މަންދޫބުންނާ ބައްދަލުކުރައްވައި، އެކުވެރިކަމާއި ގުޅިގެން މަސައްކަތްކުރުމުގެ މަގުސަދުގައި ދެފަރާތުން އިސްކަންދޭ ކަންކަމުގައި އެއްބާރުލުން އިތުރުކުރުމަށް މަޝްވަރާކުރެއްވިއެވެ.
ތައުލީމީ ވަޒީރު ޑރ. އިސްމާޢީލް ޝަފީއު ވަނީ ގްލޯބަލް ޕާޓްނަރޝިޕް ފޯ އެޑިޔުކޭޝަންގެ ފަރާތުން އދ.ގެ އާންމު މަޖިލީހުގެ 81 ވަނަ ސެޝަންގެ ހަވާސާގައި ބޭއްވި ހަރަކާތްތަކުގައި ރާއްޖޭގެ ފަރާތުން ބައިވެރިވެވަޑައިގެންފައެވެ. މި ބައްދަލުވުންތަކުގައި، ފެންވަރު ރަނގަޅު ތައުލީމު ކުރިއެރުވުމަށް ރާއްޖެއިން ކުރަމުންދާ މަސައްކަތްތަކާއި، އެކަމުގައި ދެމިއޮންނާނެކަމުގެ ޔަގީންކަން ވަޒީރު ދެއްވިއެވެ.
އދ. ގެ އާންމު މަޖިލީހުގެ 81 ވަނަ ދައުރުގެ ހައިލެވެލް ބައްދަލުވުންތަކުގެ ހަފުތާގައި، ދުނިޔޭގެ ލީޑަރުންނާއި މަންދޫބުން ބައިވެރިވެވަޑައިގެން، “ރިސްޓޯރިންގް ޓްރަސްޓް، މެނޭޖިންގް ޓްރާންސްފޯމޭޝަން: އަ ޔުނައިޓެޑް ނޭޝަންސް ދެޓް ޑެލިވާސް ފޯ އޯލް”، މި ޝިއާރުގެ ދަށުން މަޖިލީހުގައި ތަގުރީރުކުރެއްވިއެވެ.
ކިޔުންތެރިންގެ ހިޔާލު