އިރުވައި މޫސުމާ ދިމާކޮށް ދުނިޔޭގެ އެކި ކަންކޮޅުތަކުން ދިވެހިރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނިތައް ހިފުމާއި، އެތަކެތި ގޭގޭގައި ބަންދުކޮށްގެން ގެންގުޅުމާއި އަދި ވިޔަފާރިކުރުމަކީ މަނާ ކަމެއް ކަމަށާއި، އެފަދަ އަމަލުތައް ކުރާ ފަރާތްތަކާމެދު ގާނޫނީ ފިޔަވަޅު އަޅާނެކަމަށް އެންވަޔަރަންމަންޓަލް ރެގިއުލޭޓަރީ އޮތޯރިޓީން ވިދާޅުވެއްޖެއެވެ.
އެންވަޔަރަންމަންޓަލް ރެގިއުލޭޓަރީ އޮތޯރިޓީން ވިދާޅުވީ އިރުވައި މޫސުމުގައި ރާއްޖެއަށް ހިޖުރަކުރާ ދޫނިތަކަކީ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހެދިފައިވާ ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭތަކެއްޗާބެހޭ ގަވާއިދުގެ ދަށުން ހިމާޔަތްކުރެވިފައިވާ ދިރުންތަކެއް ކަމަށެވެ. މިއިން އެއްވެސް ބާވަތެއްގެ ދޫންޏެއް ހިފާ، ފިޔަކޮށާ، ކޮށީގައި ބަންދުކޮށްގެން ގެންގުޅުމަކީ އެ ގަވާއިދުގެ 17 ވަނަ މާއްދާގެ ދަށުން މަނާކަމެކެވެ.
އެންވަޔަރަންމަންޓަލް ރެގިއުލޭޓަރީ އޮތޯރިޓީން ވިދާޅުވީ މިދުވަސްވަރާ ދިމާކޮށް ގިނަ އަދަދަކަށް ދޫނި ހިފާ، އޮޅުދޫނީގެ ގޮތުގައި ގެންގުޅުމާއި ވިޔަފާރިކުރާކަން ފާހަގަކުރެވިފައިވާކަމަށެވެ. މިއީ ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާއެއް ކަމަށްވާ “ކޮންވެންޝަން އޮން މައިގްރޭޓަރީ ސްޕީޝީޒް” (ސީއެމްއެސް) އާއި ހިލާފު ކަމެކެވެ.
ރާއްޖޭގައި 2021ވަނަ އަހަރުން ފެށިގެން، 207 ބާވަތެއްގެ ދޫންޏަކީ ޙިމާޔަތްކޮށްފައިވާ ދޫނީގެ ބާވަތެވެ. 2025 ވަނަ އަހަރު އެ އޮތޯރިޓީން ކުރި ދިރާސާއަކުން ރާއްޖެއަށް ހިޖުރަކުރާ ދޫނީގެ އަދަދު މަދުވަމުންދާކަން ފާހަގަކުރެވިފައިވާތީ، މިއީ ރާއްޖޭގެ ތިމާވެއްޓާއި ދިރޭތަކެތީގެ ސިންދަފާތަށް ލިބޭ ބޮޑު ނިކަމެތިކަމެއްގެ ގޮތުގައި ވަނީ ސިފަކޮށްފައެވެ.
އެހެންކަމުން، މިފަދަ އަމަލުތަކުން ދުރުހެލިވެ، ހިފާފައިވާ ދޫނިތައް ވަގުތުން ދޫކޮށްލުމަށް އެ އޮތޯރިޓީން ވަނީ އިލްތިމާސްކޮށްފައެވެ. އަދި ގަވާއިދާ ހިލާފަށް ދޫނި ހިފާ، ގެންގުޅޭ ނުވަތަ ވިއްކާ ފަރާތްތައް ބޮޑެތި އަދަދުތަކުން ޖޫރިމަނާ ކުރެވޭނެކަމުގެ އިންޒާރުވެސް އެ އޮތޯތިޓީއިން ވަނީ ދެއްވާފައެވެ.
ގަވާއިދާ ހިލާފަށް ދޫނި ހިފާ ގެންގުޅޭ ފަރާތްތަކުގެ މައުލޫމާތު އެނގޭނަމަ، އެ ފަރާތެއްގެ މައުލޫމާތާއި، ދޫނި ހިފާފައިވާ ގޭގެ ނަމާއި، ރަށާއި އަތޮޅުގެ ތަފްސީލު، ދޫނީގެ ބާވަތް އަދި ފޮޓޯއާއި ވިޑިއޯ ފަދަ ހެކިތަކާއެކު އެ އޮތޯރިޓީގެ ފޯނު ނަންބަރު 3335949 ނުވަތަ އީމެއިލް [email protected] މެދުވެރިކޮށް ރިޕޯޓުކުރުމަށް ވަނީ އެދިފައެވެ.
ކިޔުންތެރިންގެ ހިޔާލު