އިގަލް ހިލްސް އިން ރާސްމާލޭގައި ތަރައްޤީކުރާ “މޯލްޑިވްސް ވޯޓަރފްރަންޓް އެންޑް މެރީނާ” މަޝްރޫޢަކީ ރާއްޖޭގެ އިޤްތިޞާދަށް އިންޤިލާބީ ބަދަލެއް ގެނެސްދޭނެ މަޝްރޫޢެއް ކަމުގައި މާލެ ސިޓީ އޮފް ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާޤް ހަލީމް ވިދާޅުވެއްޖެ އެވެ.
އެކްސްގައި ކުރެއްވި ޕޯސްޓެއްގައި ޙަލީމް ވިދާޅުވީ ދައުލަތް ދަރަނިނުވެ، 20 ބިލިއަން ޑޮލަރަށްވުރެ ބޮޑު އިންވެސްޓްމަންޓަކާއެކު ކުރިއަށްދާ މި މަޝްރޫޢިން ފާހަގަކޮށްލެވޭ މުހިންމު ކަންތައްތަކެއްވާ ކަމަށެވެ.
އެގޮތުން 5,000 ހައުސިންގ ޔުނިޓް ފާހަގަކުރެއްވި އެވެ. އެގޮތުން 3 ކޮޓަރީގެ 5،000 ޔުނިޓް ޑިވެލޮޕަރުގެ ޚަރަދުގައި ބިނާކުރެވޭނެ އެވެ.
ދެވަނަ ކަމަކަށް ފާހަގަ ކުރެއްވީ 54,000 އަށްވުރެ ގިނަ ވަޒީފާ އުފެދިގެން ދިއުމެވެ. މިކަމުން ދިވެހިންނަށް އައު ވަޒީފާގެ ފުރުޞަތުތައް ފަހިވެގެންދާނެ ކަމަށް ޙަލީމް ވިދާޅުވި އެވެ.
މި މަޝްރޫޢުން 11 ބިލިއަނަށް ޑޮލަރަށް ވުރެ ބޮޑު އަދަދެއް މަޝްރޫޢުގެ ޑިވެލޮޕްމަންޓް މުއްދަތުގައި ދައުލަތަށް ލިބޭނެ ކަމަށް ޙަލީކް ފާހަގަ ކުރެއްވި އެވެ.
ޙަލީމް ވަނީ މި މަޝްރޫޢުން ބިމުގެ މިލްކުވެރިކަން ދޫނުކޮށް، މުޅި މަޝްރޫޢު ހިންގޭނީ ދިވެހިރާއްޖޭގެ ޤާނޫނުތަކުގެ ހިމާޔަތުގެ ދަށުން ކަން ވެސް ފާހަގަ ކުރައްވާފަ އެވެ.
މީގެއިތުރުން، 2025 ވަނަ އަހަރުގެ މީރާގެ ރެކޯޑުތަކަށް ބަލާއިރު، ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން އެމެރިކާ ޑޮލަރު ކަމަށާ ރަސްމާލޭގެ އީގަލް ހިލްސް އިންވެސްޓްމަންޓުން ދިވެހި ދައުލަތަށް ލިބޭނެ ކަމަށް ލަފާކުރެވޭ އާމްދަނީއަކީ، 179 ރިސޯޓާއި، 16 ހޯޓަލާއި، 920 ގެސްޓްހައުސް އަދި 165 ސަފާރީ އުޅަންދު ހިމެނޭހެން، މުޅި ފަތުރުވެރިކަމުގެ ދާއިރާއިން ދައުލަތަށް ލިބޭ ޖުމްލަ އާމްދަނީއަށްވުރެވެސް އިތުރު އަދަދަކަށް ވާނެކަން ޔަގީންވާ ކަމަށް ވިދާޅުވި އެވެ.
”މީގެ މާނައަކީ، އިރާދަކުރެއްވިއްޔާ، މި މަޝްރޫޢުގެ އިންވެސްޓްމަންޓާއި ދިވެހި ރައްޔިތުންނަށް އަހަރަކު ލިބޭނެ އާމްދަނީ، މިހާރުގެ މުޅި ފަތުރުވެރިކަމުގެ ދާއިރާއަށްވުރެވެސް ބޮޑުވާނެކަން،” ޙަލީމް ވިދާޅުވި އެވެ.
ޙަލީމް ވިދާޅުވީ އިދިކޮޅު ފަރާތްތަކުން މި މަޝްރޫޢާ ދެކޮޅަށް ވާހަކަދައްކައި، ރައްޔިތުންނަށް ދޮގު މައުލޫމާތު ފެތުރުމަށް އެހާ ބޮޑަށް މަސައްކަތްކުރަނީވެސް މި ސަބަބާހުރެ ކަމަށެވެ.
އަދި ސިޔާސީގޮތުން ޚިޔާލު ތަފާތުވިޔަސް، ޤައުމަށް ލިބޭ މިފަދަ ފުރުޞަތުތަކާ ދެކޮޅަށް ދޮގު މަޢުލޫމާތު ފަތުރައި، ޤައުމުގެ ތަރައްޤީ ހުއްޓުވަން މަސައްކަތްކުރުމަކީ ޤައުމާމެދު އިޚްލާޟްތެރިކަން ނެތުން ކަމުގައި ވިދާޅުވި އެވެ.
މި މަޝްރޫޢަކީ އިޤްތިޞާދީ ކުރިއެރުމާއި، ދިވެހިންގެ ފާގަތި މުސްތަޤްބަލަކަށް އެޅޭ މުހިންމު ފިޔަވަޅެއްކަން ދިވެހި ރައްޔިތުން އަދި އަދުގެ ޒުވާނުން ޤަބޫލުކުރާ ކަމަށް ވެސް ޙަލީމް ވިދާޅުވި އެވެ.
ކިޔުންތެރިންގެ ހިޔާލު