ސަރުކާރުގެ މައި ހޮސްޕިޓާތަކުގައި ނިއުރޯ ނެވިގޭޝަން ސިސްޓަމް ގާއިމުކޮށް ހިދުމަތް ދޭން ފެށުމުން މި ސަރަހައްދުން ސިކުނޑީގެ ބަލިތަކަށް ދޭ އެންމެ ރަނގަޅު ފަރުވާ ރާއްޖެއިން ލިބިގެންދާނެކަމަށް މާލޭ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމު ވިދާޅުވެއްޖެއެވެ.
އެމްއެމްޓީވީގެ “ބޮޑު ޚަބަރު” ޕްރޮގުރާމުގައި ވާހަކަދައްކަވަމުން ސީއީއޯ ވިދާޅުވީ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަދި ދަރުމަވަންތަ ހޮސްޕިޓަލަށް ނިއުރޯ ނެވިގޭޝަން ސިސްޓަމް ތައާރަފުކުރުމުގެ މަސައްކަތް ހަލުއިކަމާއެކު ކުރިއަށްދާ ކަމަށެވެ. މި ހިދުމަތް ދިނުމަށް ބޭނުންވާ މެޝިނު މިހާރު ރާއްޖެއަށް ގެނެވިފައިވާކަން އޭނާ ފާހަގަކުރެއްވިއެވެ.
އެ ސިސްޓަމް ގާއިމުކުރެވުމުން ސިކުނޑީގެ ބަލިތަކަށް ފަރުވާކުރުމަށް ކުރަންޖެހޭ އޮޕަރޭޝަންތައް ކުރުމުގައި ވަރަށް ބޮޑު ކުރިއެރުމެއް ލިބިގެންދާނެއެވެ. ނިއުރޯ ނެވިގޭޝަން ސިސްޓަމުގެ ސަބަބުން ސީދާ މައްސަލަ ދިމާވެފައި ހުރި ތަން ދެނަގަނެ، އެހެން އެއްވެސް ތަނަކަށް ގެއްލުމެއް ނުވާ ގޮތަށް އޮޕަރޭޝަންތައް ކުރުމާއި ފަރުވާދިނުމުގެ ގާބިލުކަން ޑޮކްޓަރުންނަށް ލިބިގެންދާނެއެވެ.
ނޭޝަނަލް ސެންޓަރ ފޯ ނިއުރޯ ސައިންސަސްގެ ޕްލޭނާ އެއްގޮތަށް މި ސިސްޓަމް ގާއިމުކުރެވި ހިދުމަތް ދެވޭނެކަމަށް ވިދާޅުވަމުން ސީއީއޯ ވިދާޅުވީ މިއާއެކު ސަރަހައްދީ ފެންވަރުގައި ނާރުގެ ބަލިތަކަށް ދެވޭ އެންމެ އުސް ފަރުވާ ރާއްޖެއިން ފޯރުކޮށްދެވޭނެ ކަމަށެވެ.
ސިއްހީ ހިދުމަތް ފުޅާކުރުމަށް ކުރެވޭ މަސައްކަތްތަކުގެ ތެރޭގައި އައިޖީއެމްއެޗްގައި މިހާރު ހުރި ކެތު ލެބު އަޕްގްރޭޑުކުރުމުގެ މަސައްކަތް ބަޔަކާ ހަވާލުކުރެވިފައިވާ ކަމަށް ސީއީއޯ ފާހަގަކުރެއްވިއެވެ. އޭގެ އިތުރުން ދަރުމަވަންތަ ހޮސްޕިޓަލުގައި އައު ކެތު ލެބެއް ގާއިމުކުރުމަށް ނިންމާފައިވާއިރު، މި ދެ މަސައްކަތްވެސް މި އަހަރުގެ ތެރޭގައި ކުރިއަށްދާނެއެވެ.
އިންޓަރވެންޝަނަލް ރޭޑިއޮލޮޖީގެ ހިދުމަތް ތައާރަފުކުރުމަށް ބޭނުންވާ ޑޮކްޓަރުން ތަމްރީނުވެގެން ހޮސްޕިޓަލުތަކާ ގުޅިވަޑައިގެންފައިވާކަންވެސް ސީއީއޯ ހާމަކުރެއްވިއެވެ. ހަމައެއާއެކު ހުޅުމާލޭ ހޮސްޕިޓަލުގައި އިތުރު އެމްއާރްއައި މެޝިނެއް ބެހެއްޓުމުގެ މަސައްކަތްވެސް މިހާރު ކުރެވެމުންދެއެވެ.
ފާއިތުވި ދެ އަހަރާއި ދިހަ މަހުގެ ތެރޭގައި މާލޭ ސިޓީ ގްރޫޕް އޮފް ހޮސްޕިޓަލްސްގެ ދަށުން ހިންގާ ހޮސްޕިޓާތަކުގައި ވަރަށް ގިނަ އަލަށް ތައާރަފުކުރެވުނު ހިދުމަތްތަކެއް ވަނީ ފެށިފައެވެ. އަދި ފާއިތުވި 30 އަހަރު ތެރޭ އިތުރުނުކުރެވޭ މިންވަރަށް ހޮސްޕިޓަލްތަކުގެ އެނދުގެ އަދަދު އިތުރުކުރެވިފައިވާކަންވެސް ސީއީއޯ ވިދާޅުވިއެވެ.
ކިޔުންތެރިންގެ ހިޔާލު