އިންސްޓިޓިއުޓް އޮފް ޗާޓަޑް އެކައުންޓަންޓްސް އޮފް ދަ މޯލްޑިވްސް (ސީއޭ މޯލްޑިވްސް) އަށް ކޮންފެޑެރޭޝަން އޮފް އޭޝިއަން އެންޑް ޕެސިފިކް އެކައުންޓަންޓްސް (ސީއޭޕީއޭ) ގެ މެންބަރުކަން ލިބިއްޖެއެވެ. މިއީ ރާއްޖޭގެ އެކައުންޓަންސީ ދާއިރާ ރެގިއުލޭޓްކުރާ އިދާރާގެ ހައިސިއްޔަތުން ސީއޭ މޯލްޑިވްސްއަށް ބައިނަލްއަގުވާމީ ގޮތުން ލިބިފައިވާ ކުރިއެރުންތަކަށް އިތުރުވީ ބޮޅެކެވެ.
ސީއޭޕީއޭ އަކީ އޭޝިއާ ޕެސިފިކް ސަރަހައްދުގެ ސަރަހައްދީ ޖަމާއަތުގެ ގޮތުގައި ދުނިޔޭގެ އެކައުންޓިންގގެ މައި އިދާރާ އިންޓަނޭޝަނަލް ފެޑެރޭޝަން އޮފް އެކައުންޓަންޓްސް (އައިފެކް) އިން ކަނޑައަޅާފައިވާ ޖަމާއަތެވެ. އެ ޖަމާޢަތުގެ މެންބަރުންގެތެރޭގައި އޮސްޓްރޭލިއާ، ނިއުޒިލެންޑް، ޗައިނާ، އިންޑިއާ، ޖަޕާން، ދެކުނު ކޮރެއާ އަދި ކެނަޑާ ފަދަ ގައުމުތަކުގެ އެކައުންޓަންސީ އިދާރާތައް ހިމެނެއެވެ.
ދުނިޔޭގެ 143 އަށްވުރެ ގިނަ ގައުމުގެ 188 ޕްރޮފެޝަނަލް އެކައުންޓަންސީ އިދާރާތަކުގެ މައްޗަށް އެކުލެވޭ ދުނިޔޭގެ އެކައުންޓަންސީގެ މައި އިދާރާ އިންޓަނޭޝަނަލް ފެޑެރޭޝަން އޮފް އެކައުންޓަންޓްސް (އައިފެކް) ގެ މެންބަރެއްގެ ހައިސިއްޔަތުން އެ އިދާރާގައި ރާއްޖެ ތަމްސީލު ކުރަނީ ސީއޭ މޯލްޑިވްސްއިންނެވެ. ސީއޭ މޯލްޑިވްސްއަކީ އޭޝިއަން-އޯޝެނިއަން ސްޓޭންޑަރޑް ސެޓަރސް ގުރޫޕު (އޭއޯއެސްއެސްޖީ) އާއި ސައުތު އޭޝިއަން ފެޑެރޭޝަން އޮފް އެކައުންޓަންޓްސް (ސަފާ) ގެވެސް މެންބަރެކެވެ. އަދި ވަކިވަކި ގައުމުތަކުގެ އެކައުންޓަންސީ ބޮޑީތަކާއިއެކު ހެދިފައިވާ އެމްއޯޔޫތަކުގެތެރެއިން އިތުރު ޕާޓްނަޝިޕްތައްވެސް ސީއޭ މޯލްޑިވްސްއިން ހަދާފައިވެއެވެ.
ސީއޭ މޯލްޑިވްސްގެ މިފަދަ ބައިނަލްއަގްވާމީ ޕާޓްނަޝިޕްތަކުގެ ސަބަބުން ސީއޭ މޯލްޑިވްސްގެ ބައިނަލްއަގްވާމީ ސްޓޭންޑިންގ ވަރުގަދަވެ، ރާއްޖޭގެ އެކައުންޓަންސީ އަދި އޮޑިޓިންގ ދާއިރާ މިހާރަށްވުރެ ތަރައްގީކުރަން ފުރުސަތުތައް ފަހިވެގެން ދާނެއެވެ.
ކިޔުންތެރިންގެ ހިޔާލު