ސްޕެނިޝް ލަލީގާގެ އެއްވަނާގައި ދަމަހައްޓަމުން އައި ލީޑު ރޭގެ މެޗުންވެސް މޮޅުވެ ބާސެލޯނާއިން ދަމަހައްޓައިފިއެވެ.
ރަށުން ބޭރުގައި ލެވެންޓޭ ބަލިކުރީ 4-2ގެ ނަތީޖާއަކުންނެވެ. މިއައެކު ލީގުގައި ފުރަތަމަ ފަސް މެޗުން މޮޅުވި ހަމައެކަނި ޓީމަކީ ބާސެލޯނާއެވެ. އެޓިމުން ވަނީ ކުޅުނު 5 މެޗުން 15 ޕޮއިންޓު ހޯދާފައެވެ. ދެވަނާގައި އޮތް ރިއާލް މެޑްރިޑަށް ފަސް މެޗުން ލިބިފައިވަނީ 12 ޕޮއިންޓެވެ.
ރޭ ލަވެންޓޭއާ ދެކޮޅަށް ކުޅުނު މެޗުގައި ބާސެލޯނާއިން ލީޑުނެގީ މެޗުގެ ފަސްވަނަ މިނެޓުގައި ރަފީނިއާ ދިން ބޯޅައަކުން ޒަވީ އެސްޕާޓް ޖެހި ގޯލުންނެވެ. މެޗުގެ 19 ވަނަ މިނިޓްގައި ލަމީން ޔަމާލް ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ. ބާސެލޯނާގެ ފުރަތަމަ ދެ ލަނޑުވެސް ޖަހާފައިވަނީ ރަފީނިއާގެ ދެ އެސިސްޓުންނެވެ. ދެވަނަ ހާފަށް ނިކުތްއިރު 2-0 ގެ ނަތީޖާއަކުން ބާސެލޯނާ ކުރީގައި އޮތްނަމަވެސް ހާފުގެ ކުޅުން ފެށުނުތާ ތިންވަނަ މިނިޓުގައި ބާސެލޯނާއަށް ލިބުނު ޕެނަލްޓީ އަކުން ލަމީން ޔަމާލް ވަނީ އިތުރު ލަނޑެއް ޖަހާ މެޗުގެ ނަތީޖާ 3-0 އަށް ބަދަލުކޮށްފައެވެ.
ލެވަންޓޭ އިން މި މެޗުގައި ޖެހި ބާސެލޯނާގެ ގޯލު ހުޅުވާލާފައިވަނީ މެޗުގެ 79 ވަނަ މިނިޓުގައި އިވާން ރޮމޭރޯ ކާމިޔާބުކޮށްދިން ލަނޑުންނެވެ. އަދި މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައިވަނިކޮށް ލެވަންޓޭގެ ރޮޖަރ ބްރޫޖް ވަނީ އިތުރު ލަނޑެއް ޖަހާ މެޗުގެ ނަތީޖާ 3-2 އަށް ބަދަލުކޮށްފައެވެ.
ބާސެލޯނާއިން މި މެޗުގައި ޖެހި ހަތަރުވަނަ ލަނޑަކީ މެޗުގެ ފުރިހަމަ ވަގުތު ހަމަވެ އިންޖަރީ ވަގުތުގައި ކަރީމް އަޑެޔޭމީ ކާމިޔާބުކޮށްދީފައިވާ ލަނޑެކެވެ. ހާފުގެ މެދެއްހާ ހިސާބުން އަރިމަަތިން ލިބުނު ބޯޅަ ހިފައިގެން އޭރިއާތެރެއަށް ވަދެ، ލެވަންޓޭ ކުޅުންތެރިން ކައިރިން ނައްޓާފައި، އަޑެޔޭމީ ވަނީ ހަމަޖެހިލައިފައި ގޯލަށް ބޯޅަ ފޮނުވާލައި ލަނޑު ޖަހާފައެވެ.
ކިޔުންތެރިންގެ ހިޔާލު