އެފް.އޭ.އެމް ފުޓްސަލް އެޓޯލް ޗެމްޕިއަންޝިޕް 2026 ގެ ގާފު އަލިފު އަތޮޅުގެ ފައިނަލުގެ ޖާގައެއް ދެއްވަދޫއިން ކަށަވަރުކޮށްފިއެވެ. ދެއްވަދޫއިން ފައިނަލުގެ ޖާގަ ކަށަވަރުކުރީ ކޮނޑޭއާ ބައްދަލުކުރި މެޗު 6-1 ގެ ތަފާތު ބޮޑު ނަތީޖާއަކުން ކާމިޔާބުކޮށްގެންނެވެ.
މުޅި މެޗުގެ ކޮންޓްރޯލް ނަގައިގެން ކުޅުނު ދެއްވަދޫންއިން ވަނީ ފުރަތަމަ ހާފުގައި ހަތަރު ލަނޑު ޖަހާފައެވެ. އެގޮތުން މުހައްމަދު އިމްރާން ދެ ލަނޑު ކާމިޔާބުކޮށްދިންއިރު، އަހުމަދު ރާހިލް ރަޝީދާއި އަލީ އައިމަން އަހުމަދު ވެސް ވަނީ ފުރަތަމަ ހާފުގައި ލަނޑު ޖަހާފައެވެ.
ދެވަނަ ހާފުގައި ދެއްވަދޫގެ ލަނޑުތައް ކާމިޔާބުކުރީ، އަލީ ހޮދާދާދީ އާއި ރާހިލްއެވެ. ކޮނޑޭގެ ހަމައެކަނި ލަނޑު މެޗުގެ ފަހުކޮޅު ކާމިޔާބުކޮށްދިނީ އަބްދުﷲ މޫމިން އަހުމަދެވެ.
މި މޮޅާއެކު، ކުޅުނު ދެ މެޗުން ހަ ޕޮއިންޓް ހޯދައިގެން ދެއްވަދޫ ވަނީ ފައިނަލުގެ ޖާގައެއް ކަށަވަރުކޮށްފައެވެ. އެ ޓީމު ކުޅުނު ފުރަތަމަ މެޗުގައި ވިލިނގިލި މަރަޓާ ސްޕޯޓްސް އަތުން މޮޅުވީ 1-0 އިންނެވެ.
ފައިނަލުގެ ދެވަނަ ޖާގައަށް ވާދަކުރާނެ ޓީމެއް ކަށަވަރުވާނީ ގްރޫޕް ސްޓޭޖުގެ ފަހު މެޗުތަކަށް ފަހުގައެވެ. ހޮނިހިރު ދުވަހުގެ ރޭ ގެމަނަފުއްޓާ ބައްދަލުކޮށް 2-2 އިން އެއްވަރުވުމުން، ވިލިނގިލި މަރަޓާ ސްޕޯޓްސްއަށް އަދިވެސް ފައިނަލަށް ދިއުމުގެ ފުރުސަތު އެބައޮތެވެ. އެ މެޗުގައި ހުސައިން މިފްރާހުގެ ލަނޑުން ވިލިނގިލި ކުރި ހޯދާފައިވަނިކޮށް، ގެމަނަފުށިން ވަނީ އަހުމަދު ސުދައިޝް އާއި އަލީ ޝާޒްގެ ލަނޑުތަކުން މެޗުގެ ނަތީޖާ އަނބުރާލާފައެވެ. ނަމަވެސް، އިތުރު ވަގުތުގެ ތެރޭގައި ޝަޒްމީ މުހައްމަދު ޖަހައިދިން ލަނޑާއެކު ވިލިނގިލިން ވަނީ މުހިންމު ޕޮއިންޓެއް ހޯދާފައެވެ.
ގްރޫޕް ސްޓޭޖުގެ ފަހު މެޗުތަކުގައި ދެއްވަދޫ ބައްދަލުކުރާނީ ގެމަނަފުއްޓާއެވެ. އަދި ވިލިނގިލި ނިކުންނާނީ ކޮނޑޭއާ ދެކޮޅަށެވެ. ފައިނަލުގެ ފަހު ޖާގައަށް ވާދަކުރަނީ ވިލިނގިއްޔާއި ގެމަނަފުއްޓެވެ.
ކިޔުންތެރިންގެ ހިޔާލު