ދިވެހިރާއްޖޭގެ އިސްލާމްކަމަށް 900 އަހަރު ފުރޭއިރު، މިއަދު މި ތިބެވުނު ހިސާބާ މެދު ވިސްނާލުން މުހިންމު ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރާއްޖެ އިސްލާމްވިތާ 900 އަހަރު ފުރުން ފާހަގަ ކުރުމަށް މިރޭ ބޭއްވި ރަސްމީ ޙަފްލާގައި ތަޤުރީރު ކުރައްވަމުން ރައީސުލްޖުމްހޫރިއްޔާ ވިދާޅުވީ މިއަދު ދިވެހިރާއްޖޭގެ އިސްލާމްކަމަށް ހިޖުރީގޮތުން 900 އަހަރު ފުރޭ މި ޝަރަފުވެރި އިޙްތިފާލު އަޅުގަނޑުމެންކުރަމުންދާ އިރު، މިއަދު އަޅުގަނޑުމެންނަށް މި ތިބެވުނު ހިސާބާ މެދު ވިސްނާލުން މުހިންމު ކަމަށެވެ.
އެމަނިކުފާނު ވިދާޅުވީ އިސްލާމްދީން ދީން އަޅުގަނޑުމެންގެ އަތުގައި ހިފައިގެން މަތިވެރި ދަރަޖައަށް އަޅުގަނޑުމެން އުފުލައިދިން ކަމަށާއި ނަމަވެސް ސުވާލަކީ މިއަދު މި ތިބެވުނީ ކޮން ޙާލަތެއްގައި ތޯއާއި އަލުން ގެންނަން ޖެހޭ އިޞްލާޙަކީ ކޮބައިތޯ ވިސްނާލުން މުހިންމު ކަމަށެވެ.
“ޝައްކެއް ނެތް. ދީން ފެށޭނީ އީމާންތެރިކަމުން. އީމާންތެރިކަމުގެ މަހައްލަކީ ނުވަތަ ހިޔާވައްސަކީ ހިތް. އީމާންކަން އިތުރުވެ އުތުރިއަރަނީ ނުވަތަ މަދުވެ ހިނދެނީ އެ ހިތުގެ ތެރޭގައި.” ރައީސް ވިދާޅުވިއެވެ.
އެމަނިކުފާނު ވިދާޅުވީ އިސްލާމްދީން އަޅުގަނޑުމެންނަށް ދޭ ހުރިހާ ރައްކާތެރިކަމަކާ ހިސާބަށް އަޅުގަނޑުމެންނަށް ވާޞިލުވެވޭނީ ހިތް ރަނގަޅުކޮށްގެން، ހިތުގެ އީމާނަށް ދިރުން ދީގެންނާއި މާތް ﷲގެ ޤަޟާއާއި ޤަދަރާ މެދު އަޅުގަނޑުމެންގެ ޤަބޫލުކުރުންތަކަށް ޔަޤީންކަން ފިސާރި ފުރިހަމައަށް ދީގެން ކަމަށެވެ.
އެކަން ކުރެވޭނީ އެކަމަށް ޓަކައި ނަފުސްތައް ޠާހިރުކޮށްގެން، ހެޔޮކަމާއި ނުބައިކަމާ ދެމެދުގައި ފިސާރި ކެރުމާއި ހަރުދަނާ އިތުބާރާއެކު އިންވަކި ކުރަން އެނގިގެން ކަމަށާއި ހެޔޮމަގުން ނޫނީ ނުދާން ޢަޒުމު ކަނޑައެޅިގެން އަދި ދިރިއުޅުމުގެ ހަމަ ކޮންމެ ޙާލަތެއްގައިމެ އެ ގޮތުގައި ފައިތިލަ ސާބިތުކުރެވިގެން ކަމަށް ރައީސް ވިދާޅުވިއެވެ.
“އެ ފަދަ ފަރުދެއްގެ ޙަޔާތަކީ އިސްލާމީ ޙަޔާތެއް. އެ ފަދަ ޤައުމެއްގެ ޙަޔާތަކީ އިސްލާމްދީނުގައި ދެމި އޮތް ޙަޔާތެއް. އެއީ ޙަޤީޤީ އުފާވެރިކަމަކާއި ހިތްހަމަ ޖެހުމުން ފުރިގެންވާ ދިރުންހުރި ޙަޔާތެއް.” ރައީސް ވިދާޅުވިއެވެ.
ޤައުމީ ތަރައްޤީގައި ދީނީ މުސްތަޤުބަލް ކަނޑައަޅަންވީ ކޮންމެ ފަރުދަކާ ހަމައިން ފެށިގެން، މުޅި ޖަމާޢަތާއި ޤައުމަށް އެ ޢިއްޒަތް ފެތުރިގެންދާ ގޮތެއްގައި ކަމަށާއި ދިވެހި ޤައުމުގެ ދެމި އޮތުން ވަނީ މާތްވެގެންވާ އިސްލާމްދީން އަޅުގަނޑުމެނަށް ދޭ ތަރުބިއްޔަތާއި ރައްކާތެރިކަމުގެ މަތީގައި ކަމަށް ރައީސް ވިދާޅުވިއެވެ.
ކިޔުންތެރިންގެ ހިޔާލު