ރާއްޖޭގެ ރިސޯޓްތަކުގެ ކޮޓަރި ވިއްކުމުގައި މުއާމަލާތްކުރާ ބޭރުގެ އޭޖެންސީތަކާއި ބުކިން ޕްލެޓްފޯމްތަކުގެ މައުލޫމާތު ހިއްސާކޮށްދިނުމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ޓޫރިޒަމް ޖީއެސްޓީ (ޓީޖީއެސްޓީ) ދައްކާ ހުރިހާ ވިޔަފާރިތަކަށް އަންގައިފިއެވެ.
މީރާއިން ބުނި ގޮތުގައި އެ މައުލޫމާތު ހޯދުމުގެ މައިގަނޑު މަގުސަދަކީ ޖީއެސްޓީ ގާނޫނުގެ ދަށުން ރަޖިސްޓަރީވާންޖެހޭ ބޭރުގެ ފަރާތްތައް ރަޖިސްޓަރީކޮށްފައިވޭތޯ ކަށަވަރުކުރުމެވެ.
މި އެންގުން އަންގާފައި ވަނީ ޓޫރިޒަމް ދާއިރާގައި ރަޖިސްޓަރީވެގެން ހިންގާ ރިސޯޓްތަކާއި ގެސްޓްހައުސްތައް އަދި ޓްރެވަލް އެޖެންސީތަކަށެވެ.
ޖީއެސްޓީ ގާނޫނަށް ގެނައި އަށް ވަނަ އިސްލާހުގައިވާ ގޮތުން، ރާއްޖެއަށް އިންބައުންޑް ޓޫރިޒަމް ޕްރޮޑަކްޓް ފޯރުކޮށްދިނުމާއި އެކަމާ ގުޅޭ ބުކިން ހިދުމަތްތަކަކީ ރާއްޖޭގައި ފޯރުކޮށްދޭ ހިދުމަތެއް ކަމުގައި ވަނީ ކަނޑައަޅާފައެވެ. އެއާ އެކު، ރާއްޖެއިން ބޭރުގައި ރާއްޖޭގެ ޓޫރިސްޓު އެނދުތައް ވިއްކާ ވިޔަފާރިތަކުން ވެސް މީރާއަށް ޓީޖީއެސްޓީ ދެއްކުން ލާޒިމްވާނެއެވެ. މިއީ ކުރިން އޮންނަ އުސޫލެއް ނޫނެވެ.
ވިޔަފާރިތަކަށް ފޮނުވި ސާކިއުލާއެއްގައި މީރާއިން ބުނެފައި ވަނީ، ތަސްދީގުކުރި ޖީއެސްޓީ ގާނޫނުގެ އިސްލާހާ އެކު ރާއްޖޭގައި ދާއިމީ ތަނެއް ނުހުންނަ ބޭރުގެ ޓުއާ އޮޕަރޭޓަރުންނާއި އޮންލައިން ޓްރެވަލް އޭޖެންސީތަކާއި ބެޑް ބޭންކުތައް ފަދަ ފަރާތްތައް ވެސް މީރާގައި ޖީއެސްޓީއަށް ރަޖިސްޓަރީވާން ޖެހޭނެ ކަމަށެވެ. އެކަން ކަށަވަރުކުރުމުގެ ގޮތުން ޓޫރިޒަމް ދާއިރާގައި ރަޖިސްޓަރީކޮށްފައިވާ ފަރާތްތަކުން އެ ފަރާތްތަކާއެކު މުއާމަލާތްކުރާ ބޭރުގެ އޭޖެންސީތަކުގެ މައުލޫމާތު، އަންނަ އާދިއްތަ ދުވަހުގެ ކުރިން މީރާގެ އިންފޮމޭޝަން ސަބްމިޝަން ޕޯޓަލް މެދުވެރިކޮށް ހުށަހެޅުމަށް ވަނީ އަންގާފައެވެ.
ބޭރުގެ ޓްރެވަލް އެޖެންސީތަކުން ޓެކްސް ނަގާ މި އިސްލާހާ ގުޅިގެން ރާއްޖޭގެ ޓްރެވަލް އެޖެންޓުންގެ ޖަމްއިއްޔާ ކަމަށްވާ މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓަރުސް (މަޓާޓޯ) އިން ވަނީ އެކަމާ ދެކޮޅު ހަދާފައެވެ.
ކިޔުންތެރިންގެ ހިޔާލު