ލަލީގާގައި ރޭ މަލާގާއާއި ދެކޮޅަށް ރެއާލް މެޑްރިޑް ކުޅުނު މެޗު ފަސޭހަ ކަމާއެކު 4-0 އިން ރެއާލް މެޑްރިޑް ކާމިޔާބުކޮށްފިއެވެ.
ސެންޓިއާގޯ ބާނަބިއު ސްޓޭޑިއަމްގައި ކުޅުނު މި މެޗުގައި ގިނައިރު ބޯޅަ ހިފަހައްޓައިގެން ކުޅެފައިވަނީ ރެއާލް މެޑްރިޑްއިންނެވެ. މި މެޗުން ރެއާލް މެޑްރިޑް މޮޅުވުމާއިއެކު އެ ޓީމުން ވަނީ ލީގުގައި ކުޅުނު ތިން މެޗުންވެސް މޮޅުވެ 9 ޕޮއިންޓް ހޯދާފައެވެ. ރެއާލް މެޑްރިޑުން މި މެޗުގައި ފުރަތަމަ ލަނޑު ޖަހައި ކުރި ހޯދާފައިވަނީ މެޗުގެ 19 ވަނަ މިނިޓުގައި ޖޫޑް ބެލިންހަމް ކާމިޔާބުކޮށްދިން ލަނޑުންނެވެ.
މި މެޗުގައި ރެއާލް މެޑްރިޑުން ޖެހި ދެވަނަ ލަނޑަކީ މެޗުގެ 26 ވަނަ މިނިޓުގައި ރެއާލް މެޑްރިޑުން އުފެއްދި ހަމަލާއެއް ދިފާއުކުރަން އުޅުމުގެ ތެރޭގައި އަލްފޮންސޯ ހެރޭރޯ އަތުން ބައިކޮޅަށް ވަދެފައިވާ ލަނޑެކެވެ. އަދި މެޗުގެ ފުރަތަމަ ހާފުގެ ކުޅުން ނިމެން 15 މިނިޓަށް ވެފައިވަނިކޮށް ކިލިއަން އެމްބާޕޭ ވަނީ އިތުރު ލަނޑެއް ޖަހާ މެޗުގެ ނަތީޖާ ފުރަތަމަ ހާފުގައި 3-0 އަށް ބަދަލުކޮށްފައެވެ.
ރެއާލް މެޑްރިޑުން މި މެޗުގައި ޖެހި ހަތަރުވަނަ ލަނޑަކީ މެޗުގެ ފުރިހަމަ ވަގުތު ހަމަވެ އިންޖަރީ ވަގުތުގައި ވިނިޝިއަސް ޖޫނިއާ ދިން ޕާހަކުން އާޑާ ގުލާ ކާމިޔާބުކޮށްދީފައިވާ ލަނޑެކެވެ. މިއީ ރެއާލް މެޑްރިޑްގެ ކޯޗު ކަމާއި ހޯސޭ މޮރީނިއޯ ދެވަނަ ފަހަރަށް ހަވާލުވުމަށްފަހު އެ ޓީމު ލީގުގައި ކުޅުނު ތިންވަނަ މެޗެވެ. މޮރީނިއޯ ވަނީ މީގެ ކުރިން 2010 އިން 2013 އަށް ރެއާލް މެޑްރިޑަށް ކޯޗު ކޮށްދީ ކޮޕާ ޑެލްރޭގެ އިތުރުން ލަލީގާގެ ޗެމްޕިއަންކަން އެ ޓީމަށް ހޯދަދީފައެވެ.
ކިޔުންތެރިންގެ ހިޔާލު