ޔޫރަޕްގެ ޗެމްޕިއަން ޕީއެސްޖީއަށް ކުޅޭ ފަރަންސޭސި ފޯވަޑް ބްރެޑްލީ ބާކޯލާ 123 މިލިޔަން ޕައުންޑަށް އިންގްލިޝް ޕްރިމިއަރ ލީގުގެ ލިވަޕޫލަށް ގެންދިއުމަށް އެއްބަސްވުމަކަށް އައިއްސިއެވެ.
އިނގިރޭސި މީޑިއާތަކުން ބުނެފައިވަނީ 20 ފަހަރަށް ޕްރިމިއަރ ލީގު ކާމިޔާބު ކޮށްފައިވާ ލިވަޕޫލުންވަނީ 106 މިލިޔަން ޕައުންޑުގެ ޓްރާންސްފަރ ފީއެއްގެ އިތުރުން އެހެނިހެން ބައިތަކުގެ ގޮތުގައި އިތުރު 17 މިލިޔަން ޕީއެސްޖީއަށް ދިނުމަށް އެއްބަސްވެފައިކަމަށެވެ. އަދި ދިއެތުލެޓިކްއިން ރިޕޯޓް ކުރާ ގޮތުގައި ބާކޯލާ ލިވަޕޫލާއި އެކު 5 އަހަރު ދުވަހުގެ އެއްބަސްވުމެއްގައި ސޮއިކުރާނެއެވެ.
ފަބްރީޒިއޯ ރޮމާނޯ ބުނާގޮތުގައި ބާކޯލާ މިރޭގެ ވަގުތެއްގައި ލިވަޕޫލްގެ މެޑިކަލް ހެދުމަށްވަނީ ހަމަޖެހިފައެވެ. މިއާއެކު އުމުރުން 23 އަހަރުގެ ބާކޯލާ ވެގެންދާނީ އަންޑޯނީ އަރައޯލާގެ ސްކޮޑަށް އިތުރުވެގެންދާ ފަހުގެ އެންމެ ހައި ޕްރޮފައިލް ކުޅުންތެރިޔާ އަށެވެ.
2023 ވަނަ އަހަރު އޮލިމްޕިކް ލިއޯން އިން ޕީއެސްޖީޢަށް ބަދަލުވި ބާކޯލާވަނީ އެޓީމުގައި ކާމިޔާބު ތިން ސީޒަން ހޭދަކޮށްފައެވެ. ޖެހިޖެހިގެން ދެސީޒަންގައި ޔުއޭފާ ޗެމްޕިއަންސް ލީގު ކާމިޔާބު ކުރިއިރު ލީގު އާންގެ ތަށި ތިން ފަހަރު ކާމިޔާބު ކޮށްފައިވެއެވެ. އަދި ފެރްންޗް ކަޕް 2 ފަހަރު ކާމިޔާބު ކޮށްފައިވެއެވެ. އޭނާ ވަނީ ޕީއެސްޖީއަށް 152 މެޗު ކުޅެދީ 39 ލަނޑު ޖަހައިދީ 37 އެސިސްޓް ކޮށްފައެވެ. ޕީއެސްޖީ އާއެކު ބާކޯލާ ހަދާފައިވާ އެއްބަސްވުމުގައި ބާކީ އަދި ދެ އަހަރު އެބައޮތެވެ. ނިމިގެންދިޔަ ފީފާ ވޯލްޑް ކަޕްގައި ބާކޯލާވަނީ ފަރަންސޭސިވިލާތަށް މޮޅު ކުޅުމެއް ދައްކާދީ އެޓީމު ސެމީ ފައިނަލަށް ގެންދިއުމުގައި މުހިންމު ދައުރެއް އަދާކޮށްފައެވެ.
ބާކޯލާ ވެގެންދާނީ މިސީޒަނަށް ލިވަޕޫލަށް ގެންދާ 4 ވަނަ ކުޅުންތެރިޔާ އަށެވެ.
ކިޔުންތެރިންގެ ހިޔާލު