މާލޭގެ ފެން ރައްކާކުރުމުގެ ގާބިލުކަން އިތުރުކުރުމުގެ ގޮތުން އަންނަ އަހަރުގެ ޕީކް ސީޒަނަށް މާލޭގައި 20،000 ލީޓަރުގެ ފެން ތާންގިއެއް ބަހައްޓަން ނިންމާފައިވާ ކަމަށް މާލެ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެއެވެ.
ދިވެހިރާއްޖޭގެ އަޑުން ގެނެސްދިން “އަހާށޭ ބުނާނަން” ޕްރޮގްރާމްގައި ވާހަކަދައްކަވަމުން ފަހުމީ ވަނީ އެމްޑަބްލިޔުއެސްސީން ކުރިއަށްގެންދާ މަސައްކަތްތަކާއި ކުރިއަށް އޮތް މަޝްރޫއުތަކުގެ ތަފްސީލު ހިއްސާކުރައްވައިފައެވެ.
ފަހުމީ ވިދާޅުވި ގޮތުގައި މާލޭގައި ބަހައްޓާ 20،000 ލީޓަރުގެ ތާންގީ ވެގެންދާނީ ރާއްޖޭގައި ބަހައްޓާ އެންމެ އުސް އެއް ތާންގީ އަށެވެ. އެ ތާންގީ ބަހައްޓަން ނިންމާފައިވަނީ ކުރީގެ 30 އަހަރުވީ ބޯފެން ރައްކާކުރާ ތާންގީ ހުރި ބިމުގައެވެ.
މި ތާންގިއަކީ ގާތްގަނޑަކަށް 7 ބުރި ނުވަތަ 10 ބުރީގެ އިމާރާތެއްގެ އުސްމިނުގައި ބެހެއްޓޭ ވަރުގެ ބިޔަ ތާންގިއެކެވެ. ދެ ތާންގީގެ ފައުންޑޭޝަން މަސައްކަތް ނިމިފައިވާއިރު، އެއް ތާންގީ އަންނަ ޖެނުއަރީ ނުވަތަ ފެބްރުއަރީ މަހުގެ ތެރޭގައި ރާއްޖެ ގެނެވޭނެއެވެ.
މަޝްރޫއުގެ އަމާޒަކީ އަންނަ އަހަރުގެ ސެޕްޓެމްބަރު ނުވަތަ އޮކްޓޯބަރު މަހާ ހަމައަށް އެއް ތާންގީގެ މަސައްކަތް ނިންމާލުމެވެ. މިއާއެކު މާލޭގެ ފެނުގެ ހިދުމަތަށް ކުރިމަތިވެފައިވާ ގިނަ ދަތިތަކަކަށް ދާއިމީ ހައްލެއް ލިބިގެންދާނެ ކަމަށް އެމްޑަބްލިޔުއެސްސީން ބުނެއެވެ.
މިހާރު މާލޭގައި ހުރި ފެން ރައްކާކުރާ ސްޓޯރޭޖުގެ ބޮޑުމިނަކީ ގާތްގަނޑަކަށް 10،000 އަކަފޫޓެވެ. ދެވަނަ ތާންގީގެ މަސައްކަތް 2028 ވަނަ އަހަރުގެ ޖޫން މަހުގެ ކުރިން ނިންމުމަށް ވަނީ ރޭވިފައެވެ.
އަލަށް ބަހައްޓާ ތާންގިތަކާއެކު ފެން އުފައްދާ މެޝިންތައް ހިންގަންޖެހޭ ވަގުތު ކުޑަވެ، ކުންފުނީގެ ހަރަދުތައް ކުޑަކުރެވޭނެއެވެ. މާލެ ސަރަހައްދުގެ ފެނުގެ ހިދުމަތް ހަރުދަނާކުރުމަށް ހުޅުމާލޭގައި 10،000 ޓަނުގެ ތާންގިއެއް ބަހައްޓައި 2025 ވަނަ އަހަރުގެ އޮގަސްޓް 17 ގައި ވަނީ ބޭނުންކުރަން ފަށައިފައެވެ.
މީގެއިތުރުން މާލޭގައި 13،000 ޓަނުގެ ފެން ރައްކާކުރެވޭ ދެ ތާންގީ ބެހެއްޓުމަށް ބޭނުންވާ ސާމާނުވެސް އެމްޑަބްލިޔުއެސްސީން ވަނީ ރާއްޖެ ގެނެސްފައެވެ.
ކިޔުންތެރިންގެ ހިޔާލު