ނިމިދިޔަ ވޯލްޑު ކަޕްގައި އެންމެ މޮޅު ކުޅުންތެރިޔާގެ ޝަރަފްހޯދި ސްޕެއިންގެ ކެޕްޓަން ރޮޑްރީ، ސްޕެނިޝް ލަލީގާގެ ޗެމްޕިއަން އެފްސީ ބާސެލޯނާއަށް ސޮއިކޮށް، އެޓީމުން އާންމުކޮށް ދައްކާލައިފިއެވެ.
އިންގްލިޝް ޕްރިމިއަރ ލީގުގެ މެންޗެސްޓަރ ސިޓީއަށް ކުޅެމުންދިޔަ ރޮޑްރީ ބާސާއާއެކުވަނީ 4 އަހަރު ދުވަހުގެ އެއްބަސްވުމެއްގައި ސޮއިކޮށްފައެވެ. އުމުރުން 30 އަހަރުގެ ރޮޑްރީ ބާސާއަށް ސޮއިކޮށްފައިވަނީ 65.4 މިލިއަން ޕައުންޑްގެ އަގަކަށެވެ. 2023 ވަނަ އަހަރާ ހަމައަށް ރޮޑްރީ އެޓީމުގައި މަޑުކުރާނެއެވެ. ރޮޑްރީ ހޯދުމަށް ބާސާގެ އެންމެ ބޮޑު ވާދަވެރި ކަމަށްވާ ރެއާލް މެޑްރިޑުންވެސް މަސައްކަތް ކުރިއެވެ. ނަމަވެސް އެންމެ ފަހު ވަގުތު ރޮޑްރީ ނިންމީ ބާސާއާއި ގުޅުމަށެވެ. މިއާއެކު މިދިޔަ ސީޒަންގައި ސިޓީގެ މެދުތެރެއިން މުހިންމު ދައުރެއް އަދާކުރި ދެ ކުޅުންތެރިން މިވަނީ ސްޕެއިންގެ ވަރުގަދަ ދެޓީމާއި ގުޅިފައެވެ.
ރޮޑްރީގެ ކުރިން، ސިޓީގެ ކެޕްޓަން ބެނާޑޯ ސިލްވަރވަނީ ރެއާލް އާއި ގުޅިފައެވެ.
ވޯލްޑް ކަޕަށްފަހު ކުޑަ އޮޕަރޭޝަނެއް ކޮށްފައިވުމުގެ ސަބަބުން ސީޒަންގެ ކުރީކޮޅު ރޮޑްރީ ކުޅޭތަން ފެނިގެނެއް ނުދާނެއެވެ. 2024 ވަނަ އަހަރު ބެލޮން ޑިއޯ ކާމިޔާބު ކުރުމުގެ އިތުރުން ޔޫރަޕިއަން ޗެމްޕިއަންޝިޕް ސްޕެއިން އާއެކު ކާމިޔާބު ކޮށްފައިވާ ރޮޑްރީވަނީ މިފަހަރުގެ ވޯލްޑް ކަޕް ސްޕެއިންގެ ކެޕްޓަންގެ ހައިސިއްޔަތުން އުފުލާލުމުގެ އިތުރުން މުބާރާތުގެ މޮޅު ކުޅުންތެރިޔާގެ މަގާމުވެސް ހޯދާފައެވެ.
2019 ވަނަ އަހަރު ލަލީގާގެ އެޓްލެޓިކޯ މެޑްރިޑުން ސިޓީ އާއި ގުޅުނު ރޮޑްރީ އެޓީމުގައި ހޭދަކުރި 6 ސީޒަންގައި އޭނާ ވަނީ ގިނަ ކާމިޔާބީ ތަކެއް ހާސިލްކޮށްފައެވެ. މީގެތެރޭގައި ޕްރިމިއަރ ލީގު 4 ފަހަރު، ޗެމްޕިއަންސް ލީގު އެއްފަހަރު، އެފް އޭ ކަޕް ދެ ފަހަރު ކާމިޔާބު ކޮށްފައެވެ.
ކިޔުންތެރިންގެ ހިޔާލު