ރ. މާކުރަތު ބަނދަރު އިތުރަށް ތަރައްޤީކޮށް ބަޑުކުރުމުގެ މަޝްރޫޢުގެ ބޮޑޫ ބައެއް ނިންމާލައިފިއެވެ.
މަސައްކަތުގެ ކޮންޓްރެކްޓަރ އެމްޓީސީސީން ބުނީ މާކުރަތު ބަނދަރު ތަރައްޤީކުރުމުގެ މަޝްރޫޢުގެ %60 މަސައްކަތް މިހާރު ނިމިފައިވާކަމަށެވެ. އެގޮތުން މިހާރު ކުރިއަށްދަނީ ބޭރު ތޮށީގެ މަސައްކަތްކަމަށް އެމްޓީސީސީން ބުންޏެވެ.
2009 ވަނަ އަހަރު ތަރައްޤީކުރި މާކުރަތު ބަނދަރު މަރާމާތު ކުރުމުގެ މަސައްކަތުގެ ތެރޭގައި 45024 ކިއުބިކް މީޓަރުގެ ސަަރަޙައްދެއްގެ ބަނދަރު ފުންކުރުމާއި 140 މީޓަރުގެ ސަރަޙައްދެއްގައި ބޭރުތޮށި ލުމާއި 129 މީޓަރުގެ ސަރަޙައްދެއްގައި އެއްގަމުތޮށި ލުމާއި 85 މީޓަރުގެ ސަރަޙައްދެއްގައި ރިވެޓްމެންޓް ޖެހުން ހިމެނެއެވެ. އަދި 28 މީޓަރުގެ ސަރަޙައްދެއްގައި ގްރޮއިންސް ޖެހުމުގެ އިތުރުން 641 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމުގެ މަސައްކަތްވެސް މިމަޝްރޫއުގެ މަސައްކަތްތަކުގެ ތެރޭގައި ހިމެނެއެވެ. މި މަޝްރޫއަކީ 26.67 މިލިއަން ރުފިޔާގެ މަޝްރޫޢެކެވެ.
އާބާދީގައި 1300އަށްވުރެ ގިނަ މީހުން ދިރިއުޅެމުން އަންނަ ރ. މާކުރަތަކީ ފީނުމާއި މަސްވެރިކަން ކޮށްއުޅޭ ރަށެކެވެ. ރަށަކީ ގިނަ އަދަދަކަށް މަސްދޯނި ގެންގުޅޭ ރަށަކަށްވާއިރު ރަށަށް ދިމާވެފައި އޮތް އެންމެ ބޮޑު ގޮންޖެހުމަކީ ބަނދަރުގެ ދަތިކަމެވެ.
މިކަމަށް ހައްލެއް ހޯދާދިނުމުގެ ގޮތުން ސަރުކާރުން އަންނަނީ ރަށުގައި ޒަމާނީ ފެންވަރުގެ ބަނދަރެއް ޤާއިމްކުރުމުގެ މަސައްކަތް ކުރަމުންނެވެ.
ކިޔުންތެރިންގެ ހިޔާލު