ރާއްޖޭގައި ޑެސްޓިނޭޝަން ޕްރިންސިޕަލް ތަންފީޒުކޮށް ރާއްޖޭން ބޭރުގެ ޓުއާ އޮޕަރޭޓަރުންނާއި ބޭރުގެ ބުކިން ޕްލެޓްފޯމުތަކުން ދޭ ހިދުމަތްތަކުން ޖީއެސްޓީ ނެގުން ލާޒިމުކުރުމުގެ ބިލެއް ސަރުކާރުން މަޖިލީހަށް ހުށަހަޅައިފިއެވެ.
މި އިސްލާހުގެ މައިގަނޑު މަގުސަދަކީ އޮފްޝޯ ބުކިން ޕްލެޓްފޯމުތަކާއި ބޭރުގެ ޓުއާ އޮޕަރޭޓަރުންގެ އިތުރުން ޓްރެވަލް އޭޖެންޓުން ފޯރުކޮށްދޭ ހިދުމަތްތަކުން ޓެކްސް ނެގޭނެ ގާނޫނީ އުސޫލުތައް ކަނޑައެޅުމެވެ. މި ގޮތުން ރާއްޖޭގައި ވިޔަފާރީގެ ދާއިމީ ތަނެއް ނެތް ފަރާތްތަކުން ފޯރުކޮށްދޭ އިންބައުންޑް ޓޫރިޒަމް ހިދުމަތްތައް ފަތުރުވެރިކަމުގެ ދާއިރާގެ ހިދުމަތްތަކުގެ ތެރޭގައި ހިމެނުމަށް ބިލުގައިވަނީ ހުށަހަޅައިފަ އެވެ.
މީގެ އިތުރުން ފަތުރުވެރިކަމުގެ ހިދުމަތްދޭ ވިޔަފާރިއެއްގެ ގޮތުގައި ރަޖިސްޓްރީކޮށްފައިވާ ފަރާތްތަކުން ހިދުމަތް ދޭތާ ތިން ދުވަހުގެ ތެރޭގައި ޓެކްސް އިންވޮއިސް ތައްޔާރުކުރުން ލާޒިމުކުރުމުގެ މާއްދާއެއްވެސް މި އިސްލާހުގައި ހިމެނެ އެވެ. ހަމައެއާއެކު ބޭރުގެ ފަތުރުވެރިކަމުގެ ވިޔަފާރިތަކުން ރާއްޖޭގައި ފޯރުކޮށްދޭ އޮފްޝޯ ވިޔަފާރިތަކުން އަގު ނަގާނެ ގޮތުގެ ތަފުސީލުތައް ގާނޫނުގައި ބަޔާންކުރުމަށް ވަނީ ހުށަހަޅައިފައެވެ.
ކުޅުދުއްފުށީ އުތުރު ދާއިރާގެ މެންބަރު މުހައްމަދު ދާއޫދު މި ބިލާއެކު ހުށަހަޅާފައިވާ ހަރަދުގެ އަންދާޒާއަށް ބަލާއިރު ދައުލަތުން އެއް ފަހަރާ ކުރަންޖެހޭ ހަރަދުގެ ގޮތުގައި 2.8 މިލިއަން ރުފިޔާ ހަރަދުވާނެ އެވެ. އަދި މުވައްޒަފުންނަށް ކުރަންޖެހޭ ރިކަރަންޓް ހަރަދުގެ ގޮތުގައި އިތުރަށް 5.8 މިލިއަން ރުފިޔާ ހޭދަވާނެ ކަމަށް ބެލެވެއެވެ.
އޮފްޝޯ ބުކިން ޕްލެޓްފޯމުތަކާއި ބޭރުގެ ޓްރެވަލް އޭޖެންޓުން ރާއްޖޭގައި ޖީއެސްޓީއަށް ރަޖިސްޓްރީކޮށް ފައިސާ ދައްކަން ފަށާނީ މީރާއިން އެ ފަރާތްތަކާއެކު މަޝްވަރާކޮށް ޓެކްސް ދެއްކުމުގެ ފަސޭހަ އިންތިޒާމުތަކެއް ހަމަޖެއްސުމުންނެވެ. މި އިސްލާހު ފާސްވެ އަމަލުކުރަން ފެށުމުން ދައުލަތަށް އަހަރަކު 1.6 މިލިއަން ރުފިޔާގެ އާމްދަނީއެއް ވަންނާނެ ކަމަށް ވަނީ ލަފާކޮށްފައެވެ.
މި ބިލަށް އަމަލުކުރަން ފެށުމަށް ހުށަހަޅާފައިވަނީ އަންނަ އޮކްޓޯބަރު މަހުގެ ފުރަތަމަ ދުވަހުން ފެށިގެންނެވެ.
ކިޔުންތެރިންގެ ހިޔާލު