ހ. ފަހިވައި ގޭގައި ރޭ ހިނގި އަލިފާނުގެ ހާދިސާ އާއި ގުޅިގެން ހަތަރު މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފި އެވެ.
އަލިފާން ރޯވީ އެގޭގެ ހަތް ވަނަ ފަންގިފިލާގައި ހުންނަ އެޕާޓްމެންޓުގައި އެވެ. ހާދިސާގެ ރިޕޯޓު އެމްއެންޑީއެފް ފަޔާ އެންޑް ރެސްކިއު ސާވިސްއަށް ކުރީ ރޭ 8:40 ހާއިރު އެވެ. އަލިފާންގަނޑު ނިއްވާލެވުނީ ރޭ 9:20 އެހާއިރު އެވެ.
އެންޑީއެމްއޭއިން ބުނީ އެ ހާދިސާ ހިނގި ތިން ކޮޓަރީގެ އެޕާޓްމަންޓުގައި ދިރިއުޅޭ ތިން އަންހެނަކާއި ފިރިހެނަކަށް ފަސް ދުވަހުގެ މުއްދަތަށް ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު ހަމަޖައްސައިދީފައިވާ ކަމަށެވެ.
އަލިފާނުގެ ސަބަބުން އެ އިމާރާތުގެ ބައެއް އެޕާޓްމަންޓްތަކަށް ދުމުގެ އަސަރު ކުރި ނަމަވެސް، ދިރިނޫޅެވޭ ފަދަ ބޮޑު ގެއްލުމެއް ނުވާ ކަމަށް އެންޑީއެމްއޭ އިން ބުންޏެވެ.
މި ހާދިސާ އާއި ގުޅޭގޮތުން އެމްއެންޑީއެފުން ބުނީ ފެހިވައިގޭ ޓެރަސްއަށް ވަންނަ ދޮރުގެ ބިއްލޫރިގަނޑެއް ތަޅާލުމުގެ ތެރޭގައި އެ ސަރަޙައްދުގައި ހަރަކާތްތެރިވި ފުލުހެއްގެ އަތް ކަނޑައިގެން ގޮސްފައިވާ ކަމަށެވެ. އެ ނޫން މީހަކަށް އަނިޔާއެއް ލިބުނު ކަމުގެ ރިޕޯޓެއް ލިބިފަ ނުވާކަމަށް ބުނެފައިވެ އެވެ
އަލިފާނުގެ ސަބަބުން އެ ފަންގިފިލާއަށް ބޮޑެތި ގެއްލުންތަކެއް ލިބި އެ ތަނުގައި ހުރި ހިފާގެންގުޅޭ ސާމާނަށް ވެސް އެކި ވަރުގެ ގެއްލުން ވަނީ ލިބިފައެވެ. އަލިފާން ރޯވީ އެގޭ ސިޓިން ރޫމުގައި އެވެ.
ކިޔުންތެރިންގެ ހިޔާލު