ސިނަމާލެ ބުރިޖާއި ހައިވޭ މަތީގައި ދުއްވާފައި ދަމުން ވިއްސާރަކޯޓު ލުމަށާއި ފޯނު ނެގުމަށް މަޑުނުކުރުމަށް މޯލްޑިވްސް ޕޮލިސް ސާވިސްއިން މިއަދު އިލްތިމާސްކޮށްފިއެވެ.
ފުލުހުން މިކަމަށް އިލްތިމާސްކުރީ ވިއްސާރަކޯޓު ލުމަށްޓަކައި ގިނަ އަދަދެއްގެ ސައިކަލުތަކެއް ހައިވޭގައި މަޑުކޮށްގެން ތިބި މަންޒަރު ފެންނަ ވީޑިއޯއެއް އާންމުކުރުމަށްފަހުއެވެ. އެފަދައިން މަގުމައްޗަށް މަޑުކުރުމުގެ ސަބަބުން ނުރައްކާތެރި އެތައް އެކްސިޑެންޓުތަކެއް ހިނގާފައިވާކަން ޓްރެފިކް ފުލުހުން ވަނީ ފާހަގަކޮށްފައެވެ.
މާލެއާއި ހުޅުމާލެ ގުޅުވައިދޭ ހައިވޭއާއި ބުރިޖަކީ ބާރަށް ދުއްވާ ސަރަހައްދަކަށްވާތީ، މަގުމައްޗަށް މަޑުކުރުމަކީ އެހެން ދަތުރުވެރިންގެ ރައްކާތެރިކަމަށް އޮތް ބޮޑު ނުރައްކަލެއްކަމަށް ފުލުހުން ބުނެއެވެ. އެހެންކަމުން އެންމެންގެ ސަލާމަތާއި ރައްކާތެރިކަމަށްޓަކައި އެފަދަ އަމަލުތައް ނުކުރުމަށް ވަނީ އެދިފައެވެ.
ރާއްޖޭގެ އެކި ހިސާބުތަކަށް މިހާރު ކުރަމުންދާ ވިއްސާރައާ ގުޅިގެން މޫސުމާ ބެހޭ ގައުމީ އިދާރާއިން ލަފާކޮށްފައިވާ ގޮތުގައި، ކުރިއަށް އޮތް ހުކުރު ދުވަހާ ހަމައަށް މި ވިއްސާރަ ދެމިގެންދާނެއެވެ.
މީގެކުރިންވެސް މޫސުން ގޯސްވެ ބުރިޖު މައްޗަށް އުދައަރައިގެންނާއި، ވިއްސާރައިގައި މަގު ކަޝްވެގެން ނުރައްކާތެރި ހާދިސާތައް ހިނގައި މީހުންނަށް ބޮޑެތި އަނިޔާތައް ވެފައިވެއެވެ.
ކިޔުންތެރިންގެ ހިޔާލު