ދިވެހިރާއްޖޭގެ މެޑިކަލް ގްރެޖުއޭޓުންނަށް ސްރީލަންކާގެ މަޝްހޫރު ސުވަސެވަނަ ހޮސްޕިޓަލުން އެއް އަހަރު ދުވަހުގެ ކްލިނިކަލް އިންޓާންޝިޕް ފުރުޞަތުތައް ހޯދައިދިނުމުގެ ގޮތުން ޞިއްޙަތާއި ޢާއިލާއާއި އިޖުތިމާޢީ އެހީއާބެހޭ ވުޒާރާއާއި އެ ހޮސްޕިޓަލާ ދެމެދު ފަހުމުނާމާއެއްގައި ސޮއިކޮށްފިއެވެ.
ރޯޝަނީ ބިލްޑިންގްގައި ބޭއްވި ޚާއްޞަ ރަސްމިއްޔާތެއްގައި މި އެއްބަސްވުމުގައި ޞިއްޙީ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރު ޚަދީޖާ ޢަބްދުއްޞަމަދު ޢަބްދުﷲ އެވެ. އަދި ސުވަސެވަނަ ހޮސްޕިޓަލުގެ ފަރާތުން ސޮއިކުރެއްވީ އެ ހޮސްޕިޓަލުގެ ޑިރެކްޓަރު ބަންޑުލާ އެގޮޑަގޭއެވެ.
މި ރަސްމިއްޔާތުގައި ޞިއްޙަތާބެހޭ ވަޒީރު ޑޮކްޓަރު ޤީލާ ޢަލީގެ އިތުރުން ޞިއްޙީ ވުޒާރާއާއި ޚާރިޖީ ވުޒާރާގެ އިސް ބޭފުޅުންނާއި ސުވަސެވަނަ ހޮސްޕިޓަލުގެ މަންދޫބުން ބައިވެރިވެވަޑައިގެންނެވިއެވެ.
މި އެއްބަސްވުމުގެ ދަށުން ކޮންމެ އަހަރަކު ވިހި ދަރިވަރުންނަށް އެ ހޮސްޕިޓަލުގައި ކްލިނިކަލް ތަމްރީނު ހޯދުމުގެ ފުރުޞަތު ލިބިގެންދާނެއެވެ.
މިއީ ރާއްޖޭގައި ޑޮކްޓަރުން އުފެއްދުމަށާއި ޢަމަލީ ތަޖުރިބާ ހޯދުމުގައި ދިމާވާ ގޮންޖެހުންތަކަށް ލިބިގެންދާނެ މުހިންމު ލުޔެއް ކަމަށް ޞިއްޙީ ވުޒާރާއިން ފާހަގަކުރައްވައެވެ.
ޒަމާނީ ވަސީލަތްތަކާއެކު ލިބޭ މި ފުރުޞަތުގެ ސަބަބުން ދިވެހި ދަރިވަރުންގެ ޤާބިލުކަން އިތުރުވެ، ސަރަޙައްދީ ފެންވަރުގެ ތަޖުރިބާތަކެއް ލިބިގެންދާނެ ކަމަށް ދެ ފަރާތުން ވެސް ވަނީ ވިދާޅުވެފައެވެ.
ކިޔުންތެރިންގެ ހިޔާލު