“ފަތަމާ ހިނގާ” ގެ ނަމުގައި ރާއްޖޭގެ ހުރިހާ ރައްޔިތުންނަށް ފަތަން ދަސްކޮށްދޭ ޕްރޮގްރާމަށް ބޮޑު ތަރުހީބެއް ލިބެން ފަށައިފިއެވެ.
އެ ޕްރޮގްރާމަކީ ކުޅިވަރާ ބެހޭ ވުޒާރާ އާއި މޯލްޑިވްސް އެކުވެޓިކްސް ގުޅިގެން ކުރިއަށް ގެންދާ ހަރަކާތެކެވެ. އެ ހަރަކާތް ފެށީ މި ވެރިކަމުގައެވެ.
ސްޕޯޓްސް މިނިސްޓްރީގެ އެމްބަސެޑަރެއް ކަމަށްވާ ނައުފަލް މޫސާ “ވަގުތަށް” ވިދާޅުވީ އެ ޕްރޮގްރާމް މިހާރު ކުރިއަށް ގެންދަނީ އދ. މާމިގިލީގައި ކަމަށެވެ. އެ ރަށުގެ ސްކޫލްގެ ގްރެޑް 1 އިން ފެށިގެން 10 ގެ ދަރިވަރުން ބައިވެރިވާ ކަމަށް އޭނާ ވިދާޅުވިއެވެ. އެ ރަށުގައި ދިރިއުޅޭ މީހުންގެ ތެރެއިން 300 އެއްހާ މީހުންނަށް ވެސް ފަތަން ދަސްކޮށްދެމުން އަންނަ ކަމަށް އޭނާ ވިދާޅުވިއެވެ.
“މާމިގިލިން ލިބެމުންދާ އެއްބާރުލުން ވަރަށް ބޮޑަށް ފާހަގަކުރަން. މި ރަށުގެ ސްކޫލާއި ކައުންސިލާއި އަދި ރައްޔިތުންނަށް ވަރަށް ބޮޑަށް ޝުކުރު އަދާކުރަން.” ނައުފަލް
ނައުފަލް ވިދާޅުވީ ފެތުމުގެ އެ ޕްރޮގްރާމް މިހާރު ރާއްޖޭގެ ވަރަށް ގިނަ ރަށްރަށުގައި ކުރިއަށް ގެންގޮސްފައިވާ ކަމަށެވެ. އެގޮތުން ލ. އަތޮޅާއި ރ. އަތޮޅާއި އދ. ގެ ވަރަށް ގިނަ ރަށްތަކުގައި ޕްރޮގްރާމް ހިންގާފައިވާނެ ކަމަށް ނައުފަލް ވިދާޅުވިއެވެ. ގާތްގަނޑަަކަށް އެ ޕްރޮގްރާމްގައި 10،000 ކުދިންނަށް ފަތަން ދަސްކޮށްދީފައިވާނެ ކަމަށް އޭނާ ވިދާޅުވިއެވެ.
“މި ޕްރޮގްރާމް ފެށުމަށް ނިންމީ ރާއްޖޭގެ ކުޑަކުދިންނަށް މޫދުގައި ހިތާމަވެރި ހާދިސާތައް ދިމާވާތީ އެ ކުދިންނަށް މޫދުގެ ރައްކާތެރިކަން ހޯދައިދިނުމަށްޓަކައި. ކުދިންނަށް ފަތަން ދަސްކޮށްދިނުމާއި ސްކޫލްތަކުގެ ކަބާއި ލިޓިލްމެއިޑް ކުދިންނަށް ބެޖްތައް ލިބުމުގެ ފުރުސަތު ލިބޭނެ. މޫދުގައި އެއްކުއްޖަކު އަނެއްކުއްޖަކު ސަލާމަތްކޮށްދޭނެ ގޮތާއި އިތުރު ބައިވަރު ކަންކަން ކިޔައިދެނީ. ކޮންމެ ރަށެއްގައި ވެސް 15 ދުވަހުގެ ޕްރޮގްރާމެއް ކުރިއަށް މި ގެންދަނީ.” ނައުފަލް
ރާއްޖޭގެ އެކި ރަށްރަށުގެ އެ ޕްރޮގްރާމް ހިންގުމަށް ޝައުގުވެރިވާނަމަ އެ ފުރުސަތު ހުޅުވާލާފައިވާ ކަމަށް ވެސް ވިދާޅުވިއެވެ. އެ ޕްރޮގްރާމް ހިންގުމަށް ކުދިންގެ އަތުން އެއްވެސް ފީއެއް ނުނަގާނެ ކަމަށް ވެސް ވިދާޅުވިއެވެ.
ކިޔުންތެރިންގެ ހިޔާލު