ހުޅުމާލޭ ދެވަނަ ފިޔަވަހީގެ ފަހި ފްލެޓުތައް ކައިރީގައި އޮތް ކުނިތައް ސާފުކޮށް އިއްޔެ އެކަނިވެސް 670 ޓަނުގެ ކުނި ނަގައިފިއެވެ.
ދޯދި 10 އާއި 11 ވަނަ ޓަވަރުގެ ކުރިމަތީގައި އޮތް ހުސްބިމުގައި ބޮޑު ކުނި ފުންޏެއް އޮތްއިރު އެތަނުގައި ގިނައީ ގޭގެއިން ނެރެފައިވާ ކުންޏެވެ. އެޗްޑީސީން އިސް ނަގައިގެން މިހާރު ފަށާފައިވާ “މަދިރިން ރައްކާ” ކެމްޕޭނުގެ ދަށުން އިއްޔެ ވަނީ އެ ކުނިތައް ސާފުކޮށްފައެވެ. އެ މަސައްކަތުގައި ފަހި ދިރިއުޅުން ކޯޕަރޭޝަން (އެފްޑީސީ) އާއި ފުލުހުންނާއި ވެމްކޯ އަދި މޯޕާ ބައިވެރިވިއެވެ.
އެޗްޑީސީން ބުނީ ސާފުކުރުމުގެ މަސައްކަތް އަދި އެއްކޮށް ނުނިމޭ ކަމަށެވެ. އެހެންކަމުން މިއަދުވެސް އެ ސަރަހައްދު ސާފުކުރުމުގެ މަސައްކަތްކުރާނެކަމަށާއި، އެ މަސައްކަތް މިއަދު ނިންމާލެވޭނެކަމަށް އެޗްޑީސީން ބުންޏެވެ.
ފަހި ފްލެޓްތަކުގެ މީހުން ދިރިއުޅެން ފެށީ މިދިޔަ އަހަރު ސެޕްޓެމްބަރު މަހުއެވެ. އޭގެ ފަހުން އެ ސަރަހައްދުތަކަށް ކުނި އަޅާ މައްސަލަ ވަނީ ވަރަށް ބޮޑުވެފައެވެ. ފަހި ފްލެޓްތައް ކައިރިން ކުނި ނަގަން މިދިޔަ 8 މަސްދުވަހުގެ ތެރޭގައި 13.5 މިލިއަން ރުފިޔާ ހަރަދުވެފައިވެފައިވާކަމަށް ފަހި ދިރިއުޅުން ކޯޕަރޭޝަނުން ވަނީ ބުނެފައެވެ.
ކިޔުންތެރިންގެ ހިޔާލު