ހަނގުރާމައާ ގުޅޭގޮތުން އެއްވެސް ބަޔަކާ ވާހަކަ ދެއްކުމުގެ ޕްލޭނެއް މިވަގުތު ނެތްކަމަށް އީރާނުން ބުނެފިއެވެ.
އީރާނުން މިކަން ހާމަކޮށްފައިވަނީ، އީރާނާއި އެމެރިކާއާ ދެމެދު ވާހަކަ ދެކެވެމުންދާ ކަމަށް އެމެރިކާގެ ރައީސް ތަކުރާރުކޮށް ބުނަމުންދަނިކޮށެވެ.
އީރާނުގެ ޚާރިޖިއްޔާގެ ތަރުޖަމާނު އިސްމާއިލް ބަގާޔީ، ޕްރެސް ކޮންފަރެންސެއްގައި ވިދާޅުވީ، އެމެރިކާއާއި އީރާނާ ދެމެދު އެއްވެސް ވާހަކައެއް ނުދެކެވޭ ކަމަށެވެ.
އީރާނުގެ ވަފުދެއް އެހެން ގައުމަކަށް ފޮނުވަން ނުވަތަ އެހެން ގައުމެއްގެ ވަފުދެއް އީރާނަށް ގެނައުމުގެ ޕްލޭނެއްވެސް މިދުވަސްކޮޅު ނެތްކަމަށް ބަގަޔީ ވިދާޅުވިއެވެ.
ސަރަޙައްދުގައި ކުރިމަތިލުންތައް އިތުރުވަމުންދާތީއާއި، އަމާންކަން ގެއްލެމުންދާތީ ޗައިނާއިން ކަންބޮޑުވުން ފާޅުކޮށްފައިވާ ކަމަށާއި، ހާލަތު ގޯސްވިޔަނުދިނުމަށް ޗައިނާއިން އެގައުމަށް ކުރެވެންހުރި ކަންތައްތަކެއް ކުރަމުންދާ ކަމަށް އީރާނު ޚާރިޖިއްޔާގެ ތަރުޖަމާނު ވިދާޅުވިއެވެ.
އެހެން ގައުމުތަކެކޭ އެއްގޮތަށް ޗައިނާއިންވެސް އެހީތެރިވަމުންދާ ކަމަށާއި، އީރާނު-އެމެރިކާއާ ގުޅުންހުރި މައްސަލަތަކުގައި މެދުވެރިއެއްގެ ދައުރު އަދާކުރަމުންދަނީ ޕާކިސްތާނުން ކަމަށް ބަގާޔީ ވިދާޅުވިއެވެ. އެކަމުގައި ގަތަރުންވެސް އެހީތެރިކަން ފޯރުކޮށްދެމުންގެންދާ ކަމަށް ވިދާޅުވިއެވެ.
އީރާނު ޚާރިޖިއްޔާގެ ތަރުޖަމާނު އިސްމާއިލް ބަގާޔީ ވިދާޅުވީ، މިވަގުތު ކުރިއަށްދަނީ އީރާނާއި އުމާނާ ދެމެދު ކުރެވެމުންދާ މަޝްވަރާތަކެއް ކަމަށެވެ. އެއީ، ހޮރްމޫޒުން އުޅަނދުފަހަރަށް ރައްކަތެރިކަމާއެކު ހުރަސްކުރެވޭނެ އައު ރޫޓެއް ކަނޑައެޅުމުގެ މަޝްވަރާތަކެއް ކަމަށްވެސް ވިދާޅުވިއެވެ.
އައު ރޫޓެއް ކަނޑައެޅުމަކީ ހޮރްމޫޒު ހުޅުވުން ނޫންކަމަށްވެސް ބަގާޔީ ވިދާޅުވިއެވެ.
ކިޔުންތެރިންގެ ހިޔާލު