އޭޝިއަން ބޭންކަރސް އެސޯސިއޭޝަން، އޭބީއޭގެ 42 ވަނަ އަހަރީ އާންމު ބައްދަލުވުމާއި ކޮންފަރެންސް، އަންނަ ސެޕްޓެންބަރު މަހުގެ ފުރަތަމަ ދުވަހު ރާއްޖޭގައި ބޭއްވުމަށް ޤައުމީ ބޭންކު، ބީއެމްއެލުން ނިންމައިފިއެވެ. މި ކޮންފަރެންސް ކުރިއަށްދާނީ ތިން ދުވަހުގެ މުއްދަތަށް ސެޕްތެމްބަރު 1 އިން 3އަށް ކުރުނބާ މޯލްޑިވްސްގައެވެ.
މިއީ އޭބީއޭގެ ކޮންފަރެންސެއް ރާއްޖޭގައި ބާއްވާ ދެވަނަ ފަހަރެވެ. މީގެ ކުރިން 2018 ވަނަ އަހަރުވެސް ބީއެމްއެލް އިން ވަނީ މި ކޮންފަރެންސް ރާއްޖޭގައި ކާމިޔާބުކަމާއެކު ބާއްވާފައެވެ. ދެވަނަ ފަހަރަށް މި ފުރުސަތު ބީއެމްއެލްއަށް ލިބުމަކީ އޭޝިއާގެ ބޭންކިންގ ދާއިރާގައި އެ ބޭންކުގެ އިތުބާރާއި ލީޑަރޝިޕް ވަރުގަދަވަމުންދާކަމުގެ ހެއްކެއް ކަމަށް ބީއެމްއެލްއިން ބުންޏެވެ. މި ކޮންފަރެންސްގައި އޭބީއޭގެ މެންބަރު ޤައުމުތަކުގެ ބޭންކުތަކުގެ ސީއީއޯއިންނާއި، ސީނިއަރ އެގްޒެކްޓިވުންގެ އިތުރުން މާލީ ދާއިރާގެ ބައިނަލްއަޤްވާމީ މާހިރުން ބައިވެރިވާނެކަމަށެވެ. މި ބައްދަލުވުމުގެ މައިގަނޑު މަޤްސަދަކީ ބޭންކިންގ އަދި ފައިނޭންޝަލް ދާއިރާގެ އިސްވެރިން އެއްތަނަކަށް އެއްވެ، ސިނާއަތަށް ކުރިމަތިވެފައިވާ ގޮންޖެހުންތަކާއި، އައު ފުރުސަތުތަކުގެ އިތުރުން މާލީ ދާއިރާގެ މުސްތަޤްބަލާ ގުޅޭގޮތުން ފުޅާ ދާއިރާއެއްގައި މަޝްވަރާކޮށް ޚިޔާލު ބަދަލުކުރުމެވެ.
ރާއްޖޭގައި މި ކޮންފަރެންސް ބީއެމްއެލުން ބާއްވާނެކަން ރަސްމީކޮށް އިއުލާންކޮށްފައިވަނީ މިދިޔަ އަހަރު ބޫޓާނުގައި ބޭއްވި އޭބީއޭގެ 41 ވަނަ ކޮންފަރެންސްގައެވެ. މި ބައްދަލުވުމުގެ ތެރެއިން ބީއެމްއެލްއަށް ލިބުނު އަނެއް ބޮޑު ކާމިޔާބީއަކީ، އެ އެސޯސިއޭޝަންގެ ވައިސް ޗެއަރމަންގެ މަގާމަށް ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް އައްޔަންކުރެއްވުންކަމަށް ބީއެމްއެލުން ބުންޏެވެ.
ކިޔުންތެރިންގެ ހިޔާލު