އީރާނާއި އެމެރިކާއާ ދެމެދު އެއްވެސް މަޝްވަރާއެއް ކުރިއަށް ނުދާކަމަށް އީރާނުން ބުނެފިއެވެ.
މިއަދު ބޭއްވި ޕްރެސް ކޮންފަރެންސެއްގައި އީރާނު ޚާރިޖިއްޔާގެ ތަރުޖަމާނު އިސްމާއިލް ބަގާޔީ ވިދާޅުވީ، އީރާނުން އެމެރިކާއާ އެއްވެސް މުއާމަލާތެއް ނުކުރާ ކަމަށާއި، އެއްވެސް ސިފައެއްގައި ވާހަކަ ނުދެކެވޭ ކަމަށެވެ.
އެހެން ނަމަވެސް، މީޑިއޭޓަރުން މެދުވެރިކޮށް އެމެރިކާއިން އީރާނަށް މެސެޖްތަކެއް ފޮނުވަމުން ގެންދާ ކަމަށް ތަރުޖަމާނު ކަށަވަރު ކޮށްދެއްވިއެވެ. އެމެރިކާގެ މެސެޖްތަކަށް އީރާނުން ޖަވާބުދޭ ވާހަކައެއް ވިދާޅެއް ނުވެއެވެ.
އީރާނު ޚާރިޖިއްޔާގެ ތަރުޖަމާނު އިސްމާއިލް ބަގާޔީ ވިދާޅުވީ، ހަނގުރާމަ ކުރަންވީ ވަގުތާއި، ސުލްހަވާންވީ ވަގުތު ކަނޑައެޅުމުގެ ފުރުސަތު އީރާނުން ދުވަހަކުވެސް އެމެރިކާއަށް ނުދޭނޭ ކަމަށެވެ.
އީރާނާއި އެމެރިކާއާ ދެމެދު އެމްއޯޔޫގައި ސޮއިކުރިތާ 22 ދުވަސްފަހުން އެމެރިކާ ސިފައިން ދެ ހަފްތާވަންދެން އީރާނުގެ ރަށްތަކަށް ވަރުގަދަ ވައިގެ ހަމަލާތަކެއް ދިނުމަށްފަހު އެމެރިކާގެ ރައީސް ޓްރަމްޕް އަންގައިގެން އެމެރިކާ ސިފައިންގެ ހަމަލާތައް ވަނީ މެދުކަނޑާލާފައެވެ.
އެމެރިކާއިން އދއަށް ކަނޑައަޅާފައި ހުންނަ އެމްބަސެޑަރު އިއްޔެ ބުނީ، އެމެރިކާއިން ހަމަލާތައް ހުއްޓާލީ ޑިޕްލޮމަސީއަށް ފުރުސަތު ދިނުމުގެ ގޮތުން ކަމަށެވެ.
އެމެރިކާއިން ހަމަލާތައް ހުއްޓާލުމުން އީރާނުންވެސް ވަނީ، އެމެރިކާގެ އަސްކަރީ ބޭސްތަކަށާއި، އެމެރިކާގެ މަސްލަހަތުތަކަށް ދެމުންގެންދިޔަ ރައްދު ހަމަލާތައް މެދުކަނޑާލާފައެވެ.
ހަމަލާތައް ހުއްޓާލައި އެމެރިކާއިން އީރާނާ ވާހަކަ ދައްކަމުން ގެންދާ ކަމަށް އެމެރިކާއާއި ހުޅަނގުގެ ބައެއް މީޑިއާ ވަސީލަތްތަކުން ޚަބަރު ފެތުރިނަމަވެސް އީރާނު ޚާރިޖިއްޔާގެ ތަރުޖަމާނު ވިދާޅުވީ، އެއީ އޮޅުވާލަން ފަތުރާ ވާހަކަތަކެއް ކަމަށާއި، އެފަދަ ވާހަކަތައް ގަބޫލު ނުކުރުމަށެވެ.
އިސްމާއިލް ބަގާޔީ ވިދާޅުވީ، އީރާނުން މިވަގުތު މަޝްވަރާތައް ބާއްވަމުން ގެންދަނީ ހަމައެކަނި އުމާނާ ކަމަށާއި، އެއީ ހޮރްމޫޒު ކަނޑުއޮޅި މެނޭޖްކުރުމާ ގުޅޭގޮތުން ކުރެވެމުންދާ މަޝްވަރާތަކެއް ކަމަށެވެ. އެ މަޝްވަރާތަކުގައި އެމެރިކާ ބައިވެރި ނުކުރާ ކަމަށްވެސް އީރާނުން ބުނެއެވެ.
ކިޔުންތެރިންގެ ހިޔާލު