ދިވެހިރާއްޖޭގެ 61 ވަނަ މިނިވަން ދުވަހުގެ މުނާސަބަތާ ގުޅުވައިގެން، އޮފިޝަން އިވެންޓްސް އަދި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގުޅިގެން “ސައްބީސް ކާނިވަލް” ނަމުގައި ޚާއްޞަ ކާނިވަލެއް ފަށައިފިއެވެ.
މިމަހުގެ 31 ވަނަ ދުވަހުގެ ނިޔަލަށް ހުޅުމާލޭ ސެންޓްރަލް ޕާކުގައި ކުރިއަށްދާ މި ކާނިވަލްގެ ހަރަކާތްތައް ކޮންމެ ދުވަހެއްގެ ހަވީރު 4:00 އިން ރޭގަނޑު 11:00 އަށް ކުރިއަށްދާނެއެވެ. ހުރިހާ އުމުރުފުރާއަކަށް ބައިވެރިވެވޭ ގޮތަށް ފަރުމާކޮށްފައިވާ މި ކާނިވަލުގައި ކާނިވަލް ގޭމްސް، ހޮރޯ ހައުސް، ޑިޖިޓަލް ގޭމިންގ، ކުޑަކުދިންގެ އޭރިއާ، ފުޑް ކިއޮސްކުތައް އަދި ލައިވް މިއުޒިކާއި ބޮޑުބެރުގެ ހުށަހެޅުންތައް ހިމެނެއެވެ.
މި ކާނިވަލަށް ބޮޑު ތަރުހީބެއް ލިބެމުންދާއިރު، ޒިޔާރަތްކުރި ގިނަ ކުދިންނަށް އެންމެ ކަމުދިޔައީ ހޮރޯ ހައުސް ނުވަތަ ބިރުވެރި ހޮހަޅައެވެ. އެޗްޑީސީން ހާމަކުރި ގޮތުގައި މި ކާނިވަލުގެ މައިގަނޑު މަޤުޞަދަކީ މިނިވަން ދުވަހުގެ އުފާ ފާޅުކުރުމާއެކު، ހުޅުމާލޭގައި ދިރިއުޅޭ ރައްޔިތުންގެ މެދުގައި އެއްބައިވަންތަކަން އިތުރުކޮށް، އެންމެން އެއްތަނަކަށް އެއްވެ އުފާވެރި މާހައުލެއްގައި ވަގުތު ހޭދަކުރުމުގެ ފުރުޞަތު ފަހިކޮށްދިނުމެވެ.
އަދި ކުރިއަށް އޮތް ތަނުގައިވެސް ގައުމީ މުނާސަބަތުތައް މިފަދަ ކުލަގަދަ ގޮތެއްގައި ފާހަގަކުރުމަކީ އެ ކޯޕަރޭޝަންގެ އަމާޒެކެވެ.
ކިޔުންތެރިންގެ ހިޔާލު