ޖަޕާނު ސަރުކާރުގެ ސްކޮލަޝިޕް ޕްރޮގްރާމުގެ ދަށުން ދިވެހިރާއްޖެއަށް 152 މިލިއަން ޖަޕަނީސް ޔެންގެ ހިލޭ އެހީ ދިނުމުގެ އެއްބަސްވުމުގައި ދިވެހި ސަރުކާރާއި ޖަޕާނު ސަރުކާރާ ދެމެދު މިއަދު ސޮއިކޮށްފިއެވެ.
މި އެއްބަސްވުމަކީ ޖަޕާން ސަރުކާރުގެ އިންސާނީ ވަސީލަތް ތަރައްގީކުރުމުގެ ސްކޮލަޝިޕް މަޝްރޫއުގެ ދަށުން މި އަހަރަށް ދޭން ހަމަޖެހިފައިވާ ފުރުސަތުތަކާ ގުޅޭގޮތުން ސޮއިކުރެވުނު އެއްބަސްވުމެކެވެ. މިއަދު ހެނދުނު ޚާރިޖީ ވުޒާރާގައި ބޭއްވި ޚާއްސަ ރަސްމިއްޔާތެއްގައި ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރު ޝެރީނާ އަބްދުއްސަމަދެވެ. އަދި ޖަޕާން ސަރުކާރުގެ ފަރާތުން ސޮއިކުރެއްވީ އެ ގައުމުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު އިޝިގާމީ ރުމިކޯއެވެ.
މި އެއްބަސްވުމުގެ ދަށުން ޖަޕާނުން ރާއްޖެއަށް 152 މިލިއަން ޖަޕަނީސް ޔެން ނުވަތަ 1020134 އެމެރިކާ ޑޮލަރުގެ ހިލޭ އެހީ ދިނުމަށް ވަނީ ނިންމައިފައެވެ. 2020 ވަނަ އަހަރުން ފެށިގެން ޖަޕާނުން ދެމުން އަންނަ މި އެހީގެ މައިގަނޑު މަގުސަދަކީ ޖަޕާނުގެ އެންމެ މަތީ ފެންވަރުގެ ޔުނިވަސިޓީތަކުގައި މާސްޓާސް ޑިގްރީއަށް ކިޔެވުމުގެ ފުރުސަތު ދިވެހި ދަރިވަރުންނަށް ހޯދައިދިނުމެވެ. މީގެ އިތުރުން މުސްތަގުބަލުގައި ރާއްޖޭގެ އިޖުތިމާއީ އަދި އިގުތިސާދީ ތަރައްގީގެ ސިޔާސަތުތައް އެކުލަވާލުމާއި ތަންފީޒުކުރުމުގައި ޝާމިލުވާނެ ގާބިލު ޒުވާނުން ބިނާކުރުމަކީ ވެސް މި ޕްރޮގްރާމުގެ ވަރަށް މުހިންމު އަމާޒެކެވެ.
މި މަޝްރޫއުގެ ކާމިޔާބީއަށް ބަލާއިރު މިހާތަނަށް ޖުމުލަ 17 ދަރިވަރުން މި ޕްރޮގްރާމުގެ ދަށުން ތައުލީމު ހާސިލުކޮށް ދަސްވެނިވެފައިވެއެވެ. އަދި މިހާރު ވެސް ޖަޕާނުގެ އެކި ޔުނިވަސިޓީތަކުގައި ރާއްޖޭގެ 9 ދަރިވަރަކު މަތީ ތައުލީމު ހާސިލުކުރަމުންދާކަން ފާހަގަކުރެވެއެވެ. މިއަދު ބޭއްވި ސޮއިކުރުމުގެ ރަސްމިއްޔާތުގައި ޚާރިޖީ ވުޒާރާއާއި ތައުލީމާއި މަތީ ތައުލީމާއި ހުނަރު ތަރައްގީކުރުމާ ބެހޭ ވުޒާރާއާއި މާލީ ކަންކަމާ ބެހޭ ވުޒާރާގެ އިތުރުން ޖަޕާނުގެ އެމްބަސީއާއި ޖައިކާގެ އިސް ބޭފުޅުން ބައިވެރިވެވަޑައިގެންނެވިއެވެ.
ކިޔުންތެރިންގެ ހިޔާލު