ހުޅުމާލޭގެ ދެވަނަ ފިޔަވަހީގެ ހިޔާ ފްލެޓްތަކުގައި ދިރިއުޅޭ ރައްޔިތުންނަށް ދިމާވެފައިވާ ލިފްޓުގެ ދަތިކަމަށް ދާއިމީ ޙައްލެއް ހޯދައިދިނުމުގެ މަޝްރޫޢު ނިންމައި، އައު ލިފްޓުތައް ރަސްމީކޮށް އިފްތިތާޙުކޮށްފިއެވެ. ހިޔާ ޓަވަރުތަކުގައި އިތުރު ލިފްޓު ހަރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. މި މަޝްރޫޢު ރަސްމީކޮށް އިފުތިތާޙުކޮށްދެއްވީ ބިނާރާއި ގެދޮރުވެރިކަމާ އުމްރާނީ ތަރައްޤީއާ ބެހޭ ވަޒީރު، ޑރ. ޢަބްދުﷲ މުއްޠަލިބްއެވެ.
މި މަޝްރޫޢުގެ ދަށުން ހިޔާގެ 16 ޓަވަރުގެ ތެރެއިން ކޮންމެ ޓަވަރަކަށް 2 ލިފްޓު އިތުރުކޮށް، ޖުމްލަ 32 ލިފްޓު ވަނީ ހަރުކޮށްފައެވެ. އޭގެ ތެރޭގައި ހިމެނެނީ ބަލިމީހުން އުފުލުމަށް ޚާއްޞަ ސްޓްރެޗަރ އެރުވޭނެ ފަދަ 21 މީހުންގެ ޖާގައިގެ ބޮޑު ލިފްޓަކާއި، އާންމުން ދަތުރުކުރުމަށް ބޭނުންކުރާނެ 14 މީހުންގެ ޖާގައިގެ ލިފްޓެކެވެ. މި ލިފްޓުތަކަކީ ލޮލުގެ ފެނުމުން މަޙްރޫމްވެފައިވާ މީހުންނަށް ފަސޭހައިން ބޭނުންކުރެވޭނެހެން ބްރެއިލް އަކުރުން ފްލޯ ނަންބަރުތައް ޖަހާފައިވާ ޒަމާނީ ލިފްޓުތަކެކެވެ.
25 ފަންގިފިލާގެ ހިޔާ މަޝްރޫޢުގައި 6,720 ހައުސިންގ ޔުނިޓް ހިމެނޭއިރު، ކޮންމެ ޓަވަރެއްގައި 400 އެއްހާ އެޕާޓްމަންޓް ހުރެއެވެ. އަދި ކޮންމެ ޓަވަރެއްގެ އާބާދީ 2,000 އާ ގާތްކުރެއެވެ. ޓަވަރުތައް ފުރަތަމަ ތަރައްޤީކުރިއިރު، އެތަންތަނުގައި ހަރުކޮށްފައިވަނީ ބަލިމީހުން އުފުލޭހާ ތަނަވަސް ލިފްޓުތަކެއް ނޫނެވެ. މީގެ ކުރިން ކޮންމެ ޓަވަރެއްގައި ހުންނަނީ 3 ނުވަތަ 4 ލިފްޓެވެ. އެހެންކަމުން، އާބާދީ ބޮޑު މި ޓަވަރުތަކުގެ ރައްޔިތުންނަށް އަރައި ފޭބުމުގައި ކޮންމެ ދުވަހަކު ބޮޑެތި ކިއުތަކެއްގައި މަޑުކުރަންޖެހި، ގިނަ ދަތިތަކަކާ ކުރިމަތިލާން ޖެހުނެވެ.
މި މައްސަލައަށް އަވަސް ޙައްލެއް ގެނައުމަށްޓަކައި ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން މި މަސައްކަތް ޗައިނާގެ ޝެންޔަންގް ޔުއާން އިންޓެލެކްޗުއަލް ގްރޫޕާ ޙަވާލުކުރިއެވެ. އަދި މި މަޝްރޫޢުގެ ޢަމަލީ މަސައްކަތް ފަށާފައިވަނީ 2024 ވަނަ އަހަރުގެ އޭޕްރީލް މަހުގެ ތެރޭގައެވެ. އައު ލިފްޓުތަކާއެކު ހިޔާ ފްލެޓްތަކުގެ ރައްޔިތުންނަށް އަރައި ފޭބުމުގައި ބޮޑު ލުޔެއް ލިބިގެންދާނެއެވެ.
ކިޔުންތެރިންގެ ހިޔާލު