ހުޅުމާލޭ ދެވަނަ ފިޔަވަހީގައި ހުންނަ އަމާން ދޯދި 5 ގެ ދެވަނަ ފަންގިފިލާއިން ވެއްޓި އަނިޔާވި 16 އަހަރުގެ ފިރިހެން ކުއްޖާއަށް ފަރުވާދިނުމަށްފަހު މިހާރު ވަނީ ވެންޓިލޭޓަރުން ނަގާފައެވެ.
މިދިޔަ އަންގާރަ ދުވަހުގެ ރޭ ހިނގި މި ހާދިސާގައި އަނިޔާވި ކުއްޖާއަށް އެންމެ ފުރަތަމަ ފަރުވާދީފައިވަނީ ހުޅުމާލެ ހޮސްޕިޓަލުގައެވެ. އޭގެ ފަހުން އެ ކުއްޖާގެ ހާލަތު ސީރިއަސްވުމާ ގުޅިގެން، އިތުރު ފަރުވާ ދިނުމަށްޓަކައި އައިޖީއެމްއެޗަށް ވަނީ ބަދަލުކޮށްފައެވެ.
އައިޖީއެމްއެޗުން މިއަދު މައުލޫމާތު ދީފައިވާ ގޮތުގައި އެ ކުއްޖާގެ ހާލަތު ރަނގަޅުވަމުން އަންނާތީ، މިހާރު ވަނީ ވެންޓިލޭޓަރުން ނަގާފައެވެ. އަދި މިހާރު އެ ކުއްޖާއަށް ފަރުވާ ދެމުން އަންނަނީ އާންމު ވޯޑަށް ބަދަލުކޮށްގެން ކަމަށްވެސް އެ ހޮސްޕިޓަލުން ބުނެފައިވެއެވެ. ނަމަވެސް އެ ކުއްޖާއަށް ލިބިފައިވާ އަނިޔާތަކުގެ އެއްވެސް ތަފުސީލެއް ހޮސްޕިޓަލުން ހާމަކޮށްފައެއް ނުވެއެވެ.
މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ދިވެހި ފުލުހުންގެ ޚިދުމަތުން އަންނަނީ މި މައްސަލަ ތަހުގީގުކުރަމުންނެވެ. މިހާތަނަށް މި ހާދިސާއާ ގުޅޭގޮތުން ފުލުހުން އިތުރު މައުލޫމާތެއް އާންމުކޮށްފައެއް ނުވެއެވެ. މައްސަލައިގެ ތަހުގީގު ނިމުމުން އިތުރު ތަފުސީލުތައް ލިބިގެންދާނެ ކަމަށް ބެލެވެއެވެ.
ކިޔުންތެރިންގެ ހިޔާލު