ފަރަންސޭސިވިލާތުގެ ބަޖެޓު އެއާލައިނެއް ކަމަށްވާ ފްރެންޗް ބީ އިން މި އަހަރުގެ ޑިސެމްބަރު މަހުގެ 18 ވަނަ ދުވަހު ރާއްޖެއަށް ސީޒަނަލް ދަތުރުތައް ފެށުމަށް ނިންމައިފިއެވެ.
ފްރެންޗް ބީގެ ފިނިމޫސުމުގެ ޝެޑިއުލް ފުޅާކުރުމުގެ ބައެއްގެ ގޮތުން ރާއްޖެއާއި އަވައްޓެރި ސްރީލަންކާއަށް ދަތުރުތައް ފެށުމަށް ވަނީ ހަމަޖެހިފައެވެ. މި ދަތުރުތައް ކުރިއަށްދާނީ މިއަހަރުގެ ޑިސެމްބަރު މަހުން ފެށިގެން އަންނަ އަހަރުގެ މޭ މަހުގެ ނިޔަލަށެވެ. މިއީ ފަތުރުވެރިކަމުގެ ޕީކް ސީޒަނާ ދިމާކޮށް އެ ކުންފުނީގެ އާމްދަނީ އިތުރުކުރުމަށް އެޅިގެންދާ މުހިންމު ފިޔަވަޅެކެވެ.
އެ އެއާލައިނުގެ ސީއީއޯ މާކް-އެންޓޮއިން ވިދާޅުވެފައިވާ ގޮތުގައި، ދުރު ރާސްތާގެ ލެޝާ މާކެޓުތަކުގައި ފްރެންޗް ބީގެ ހިއްސާ ވަރުގަދަކުރުމަކީ ކުންފުނީގެ މައިގަނޑު އެއް އަމާޒެވެ. ރާއްޖެ ފަދަ މަތީ ފަންތީގެ ފަތުރުވެރިކަމުގެ މަންޒިލަކަށް ބަޖެޓު އެއާލައިނަކުން ދަތުރުތައް ފެށުމަކީ، ޔޫރަޕުގެ މެދު ފަންތީގެ ފަތުރުވެރިންނަށް ރާއްޖެއަށް އައުމަށް ހުޅުވިގެންދާނެ އާ ދޮރެކެވެ. މީގެ ސަބަބުން ވައިގެ ދަތުރުފަތުރުގެ ބާޒާރުގައި ވާދަވެރިކަން ބޮޑުވެގެންދާނެއެވެ.
ފަތުރުވެރިކަމާ ބެހޭ ވުޒާރާއިން އާންމުކޮށްފައިވާ ތަފާސްހިސާބުތައް ދައްކާ ގޮތުން، ފަރަންސޭސިވިލާތަކީ މިވަގުތު ރާއްޖެއަށް ހަތްވަނައަށް އެންމެ ގިނަ ފަތުރުވެރިން އަންނަ ގައުމެވެ. މި އަހަރުގެ މިހާތަނަށް އެ ގައުމުން 29،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. އާ އެއާލައިނާއެކު ޖާގަ އިތުރުވެ، ފްލައިޓް ޓިކެޓުގެ އަގުތަކަށް ހެޔޮ ބަދަލެއް އައުމުން، ފަރަންސޭސިވިލާތުން ރާއްޖެއަށް އަންނަ ފަތުރުވެރިންގެ އަދަދު ބޮޑުތަނުން އިތުރުވެ، ރާއްޖޭގެ އިގުތިސާދަށް އޭގެ ހެޔޮ އަސަރު ކުރާނެކަމަށް ބެލެވެއެވެ.
ކިޔުންތެރިންގެ ހިޔާލު