މާލޭގެ ހެންވޭރު ފިލިގަސް މަގުގައި ހުރި ގެއެއްގައި ގޭސް ލީކުވެ ހިނގި ގޮވުމެއްގައި އެކަކަށް ކުދި އަނިޔާތަކެއް ލިބިއްޖެއެވެ.
މި ހާދިސާގައި އަނިޔާވި މީހާގެ ހާލު މިހާރު ރަނގަޅު ކަމަށާއި އޭނާއަށް ސީރިއަސް އަނިޔާއެއް ލިބިފައި ނުވާ ކަމަށް ފުލުހުން ކަށަވަރުކޮށްދެއެވެ.
އެމްއެންޑީއެފުން މައުލޫމާތު ދޭ ގޮތުގައި މި ގޮވުން ހިނގަން މެދުވެރިވީ ގޭސް ލީކުވެފައި ހުރުމުން އެކަން ނޭނގި އުނދުނެއް ރޯކުރަން އުޅުމުގެ ތެރޭގައި ޖަމާވެފައިވާ ގޭހުގެ ސަބަބުންނެވެ. ވައި ދައުރުނުވާ ގޮތަށް ބަންދުވެފައި ހުރި ތަނެއްގައި މި ގޭސް ޖަމާވުމުން އުފެދުނު ޕްރެޝަރުގެ ސަބަބުން މި ހާދިސާ ހިނގާފައިވާ ކަމަށް ބެލެވެއެވެ.
މި ގޮވުމުގެ ސަބަބުން ގޭގެ ބިއްލޫރި ކުޑަދޮރެއް ފަޅައިގެން ގޮސް، ބިއްލޫރިކޮޅުތައް މަގުމައްޗަށް ބުރައިގެން ގޮސްފައިވެއެވެ. އެމްއެންޑީއެފްގެ މީޑިއާ އޮފިޝަލަކު ވިދާޅުވީ މި ހާދިސާގައި އެއްވެސް ތަނެއްގައި އަލިފާން ރޯވެފައި ނުވާ ކަމަށާއި، ބިއްލޫރިތައް ފަޅައިގެން ދިޔައީ ގޮވުމުގެ އަޑާއެކު އުފެދުނު ބާރުގަދަ ޕްރެޝަރުގެ ސަބަބުން ކަމަށެވެ.
ކިޔުންތެރިންގެ ހިޔާލު