ޑެންގީ ހުން އިތުރުވެފައިވާ މި ދަނޑިވަޅުގައި، މަދިރި ކޮންޓްރޯލްކުރުމަށްޓަކައި އެޗްޕީއޭ އާއި ކަމާބެހޭ އިދާރާތައް ގުޅިގެން މާލޭ ސަރަހައްދުގެ 300އަށް ވުރެ ގިނަ ތަންތަން ބަލައި ފާސްކޮށްފިއެވެ.

އެޗްޕީއޭއިން މިއަދު ބުނީ، މިމަހުގެ 19ވަނަ ދުވަހުން ފެށިގެން 23ވަނަ ދުވަހުގެ ނިޔަލަށް، ސިޓީ ކައުންސިލާއި، އެޗްޑީސީއާއި، ރެޑް ކްރެޒެންޓާއި، ހުޅުމާލޭ ހޮސްޕިޓަލުގެ އިތުރުން ވިލިމާލޭ ހޮސްޕިޓަލާ ގުޅިގެން، މާލޭގެ 308 ސަރަހައްދެއް ބަލައި ފާސްކޮށްފައިވާ ކަމަށެވެ.

އެގޮތުން، މާލޭން 153 ތަނެއް، ހުޅުމާލޭން 83 ތަނެއް، ވިލިމާލޭން 59 ތަނެއް، ތިލަފުށިން 12 ތަނެއް، އަދި ގުޅީފަޅުން އެއް ތަން ބަލައި ފާސްކޮށްފައިވާ ކަމަށް، އެޗްޕީއޭއިން ބުންޏެވެ.

މި އިންސްޕެކްޝަންގައި ބަލައިފައިވަނީ އިމާރާތްކުރަމުންދާ ސައިޓުތަކާއި މީހުން ދިރިއުޅޭ އިމާރާތްތަކުގެ އިތުރުން، ބޭނުންނުކުރާ ހުސް ޖާގަތަކެވެ.

މި އިންސްޕެކްޝަންގެ ތެރެއިން މަދިރި އުފެދި، އާލާވާނެ ކަމަށް ބެލެވޭ ގިނަ ތަންތަން ބަލައި އެ ތަންތަން ނައްތާލައިފައިވާ ކަމަށް އެޗްޕީއޭއިން ބުންޏެވެ.

ޑެންގީ ހުން ޖެހިގެން ފަރުވާ ހޯދަމުން ދަނިކޮށް، 17 އަހަރުގެ އަންހެން ކުއްޖަކާއި 23 އަހަރުގެ ފިރިހެނަކު ވަނީ މަރުވެފައެވެ.