މި އަހަރުގެ މިހާތަނަށް މުޅި ރާއްޖެއިން 2,183 ޑެންގީ ހުން ޖެހިގެން ރިޕޯޓްކޮށްފައިވާ ކަމަށާއި، މިއީ މިދިޔަ އަހަރުގެ މި މުއްދަތާ އަޅާބަލާއިރު ފަސް ގުނައަށްވުރެ ބޮޑު އިތުރުވުމެއް ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ. ތަފާސްހިސާބުތަކުން ދައްކާ ގޮތުގައި މިދިޔަ އަހަރުގެ ފުރަތަމަ ހަތަރު މަސްދުވަހު ރިޕޯޓްކޮށްފައިވަނީ އެންމެ 374 ކޭސްއެވެ.
މި އަހަރުގެ ތަފާސްހިސާބުތަކަށް ބަލާއިރު، އެންމެ ގިނަ ކޭސް ރިޕޯޓްކޮށްފައިވަނީ ޖެނުއަރީ މަހުގައެވެ. އެ މަހު 679 ކޭސް ރިޕޯޓްކޮށްފައިވާއިރު، ފެބްރުއަރީ މަހު 428 ކޭސް، މާރިޗް މަހު 600 ކޭސް އަދި އޭޕްރީލް މަހު 476 ކޭސް ވަނީ ރިޕޯޓްކޮށްފައެވެ. މިއީ މިދިޔަ އަހަރުގެ މި މުއްދަތުގައި ކޮންމެ މަހަކު 100 އަށްވުރެ މަދުން ކޭސްތައް ހުރި މިންވަރާ އަޅާބަލާއިރު ބޮޑު އިތުރުވުމެކެވެ.
ބަލި ފެތުރިފައިވާ ސަރަހައްދުތަކަށް ބަލާއިރު، އެންމެ ގިނަ ކޭސް ރިޕޯޓްކޮށްފައިވަނީ އަތޮޅުތެރެއިންނެވެ. އަތޮޅުތަކުން 1,813 ކޭސް ރިޕޯޓްކޮށްފައިވާއިރު، މާލެ ސަރަހައްދުން ރިޕޯޓްކޮށްފައިވަނީ 370 ކޭސްއެވެ. އެޗްޕީއޭ އިން ބުނީ ބަލި ކޮންޓްރޯލް ކުރުމަށް މަސައްކަތް ކުރަމުންދާ ކަމަށާއި، މަދިރި އުފެދޭ ތަންތަން ނައްތާލުމަށް ސަމާލުކަން ދިނުމަށް އިލްތިމާސްކުރާ ކަމަށެވެ.
ކިޔުންތެރިންގެ ހިޔާލު