މިއަދު ކުރިއަށްދާ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ދެވަނަ ބުރުގެ ވޯޓުލުމުގައި ވީހާވެސް އަވަހަށް ނުކުމެ ވޯޓުލުމަށް އިލެކްޝަންސް ކޮމިޝަންގެ ރައީސް މުޙައްމަދު ޒާހިދު އިލްތިމާސްކުރައްވައިފިއެވެ.
މިމަހުގެ 4 ވަނަ ދުވަހު ބޭއްވި ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުތަކުގައި ނަތީޖާ އެއްވަރުވީ 5 ދާއިރާއެއްގެ އެކި މަޤާމުތަކަށް މީހުން އިންތިޚާބުކުރުމަށް އިންތިޚާބުގެ އިތުރު ބުރުގެ ވޯޓުލުން ފެށީ މިއަދު ހެނދުނު 8 ޖެހިއިރުގައެވެ. މާލެއާއި އަތޮޅުތަކުގެ ރަށްރަށުގައި މިބުރުގައި ވޯޓުލުމަށް 14 ވޯޓު ފޮއްޓެއްވަނީ ބަހައްޓާފައެވެ. ވޯޓުގެ ކަންކަމާއި ގުޅޭގޮތުން އިލެކްޝަންސް ކޮމިޝަންގެ ރައީސް މުޙައްމަދު ޒާހިދު ވިދާޅުވީ މިމަހުގެ 4 ވަނަ ދުވަހު ބޭއްވި 3 އިންތިޚާބުގައި ވޯޓުލުމަށް ހޭދަވި ވަގުތާ އަޅާ ބަލާއިރު، މިއަދުގެ ވޯޓުލުމަށް ހޭދަވާ ވަގުތު ކުޑަކަމަށެވެ. އެގޮތުން ވޯޓުލާ މަރުކަޒަށްވަދެ ވޯޓު ކަރުދާސްކޮޅުގައި ފާހަގަޖެހުމާއި ވޯޓުފޮއްޓަށް އެޅުމަށްފަހު ނުކުތުމާއި ދެމެދު ހޭދަވަނީ އެވްރެޖްކޮށް 1 މިނިޓުކަމަށެވެ. މިކަމުން ހާމަވަނީ މިފަހަރުގެ އިންތިޚާބުގެ އިންތިޒާމުތައްވެސް ރަނގަޅުކަންކަމަށް ކޮމިޝަންގެ ރައީސް ވިދާޅުވިއެވެ.
އިންތިޚާބުގެ އިތުރުބުރުގެ ވޯޓުލުން ކުރިއަށްދާނީ ހެނދުނު 8އިން ހަވީރު 4 ޖެހުމާހަމައަށެވެ. 5 ދާއިރާއެއްގެ އިތުރުބުރުގައި ވޯޓުލުން ކުރިއަށްދާއިރު މިދާއިރާތަކުން 6093 މީހުންނަށް ވޯޓުލުމުގެ ޙައްގުވަނީ ލިބިފައެވެ.
ކިޔުންތެރިންގެ ހިޔާލު