ބޮޑުހިލައާއި އިމާރާތްކުރުމުގެ ދާއިރާއަށް ބޭނުންވާ ސާމާނު ގެންނަނީ މެދުއިރުމަތިންކަމަށާއި، ހަނގުރާމައިގެ ސަބަބުން ތަކެތި ލިބުމުގައި ދަތިތަކެއް ކުރިމަތިވާކަމަށް އިމާރާތްކުރުމާއި ގެދޮރުވެރިކަމާ ބެހޭ ވަޒީރު ޑރ.ޢަބްދުﷲ މުއްޠަލިބް ވިދާޅުވެއްޖެއެވެ.
ވަޒީރު ޑރ.މުއްޠަލިބް މަޖިލީހަށް ހާޒިރުކޮށް ސުވާލުކުރުމަށް ދިން ފުރުޞަތުގައި، މެންބަރުން ވަނީ އަތޮޅުތަކުގައި ބައެއް މަޝްރޫޢުތައް މަޑުޖެހެމުންދާކަން ފާހަގަކޮށްފައެވެ.
ވެލިދޫ ދާއިރާގެ މެންބަރު މުޙައްމަދު ޢައްބާސް ސުވާލުކުރެއްވީ އެ ދާއިރާގެ ފޮއްދުއަށް ބޮޑުހިލަ ނުލިބިގެން ފޮއްދޫގެ ބަނދަތުގެ މަސައްކަތް ލަސްވާ މައްސަލައާއި ވެލިދޫގެ ބަނދަރާއި ޅޮހީގެ ފެނާއި ނަރުދަމާގެ މަސައްކަތް ލަސްވުމުގެ ކަންބޮޑުވުމެވެ.
އެ ސުވާލަށް ޖަވާބުދެއްވާ ވަޒީރު ޑރ. މުއްޠަލިބް ވިދާޅުވީ، މެދުއިރުމަތީގެ ހަނގުރާމައާ ގުޅިގެން، އެ ސަރަޙައްދުން ރާއްޖެ އެތެރެކުރާ މުދާ ލިބުމުގައި ލަސްތައް އުޅޭކަމަށެވެ. އެގޮތުން ބޮޑު ހިލައާއި އިމާރާތްކުރުމުގެ މަސައްކަތަށް ބޭނުންވާ ބައެއް ޢާއްމު ބާވަތްތަކަކީ އެ ސަރަޙައްދުން އެތެރެކުރާ ބާވަތްތައްކަން ފާހަގަކުރެއްވިއެވެ.
“އާއްމުކޮށް ބޮޑު ހިލަ ގެންނަނީ ޔޫއޭއިން، މެދުއިރުމަތިން. ޔޫއޭއީއިން ހިލަގެނައުމުގައި ބޮޑެތި ދަތިތަކެއް ކުރިމަތިވެފައިވަނީ. މަސައްކަތް މިކުރަނީ އިންޑިއާއިން ނަމަވެސް ހިލަ ގެނެސްގެން މަސައްކަތް އަވަސްކުރުމަށް. ފޮއްދޫ ބަނދަރުގައިވެސް ބޮޑު ހިލަ ލިބުމުގައި ދަތިތައް ވަނީ ދިމާވެފައި.” ވަޒީރު ޑރ.ޢަބްދުﷲ މުއްޠަލިބް ވިދާޅުވިއެވެ.
އިމާރާތްކުރުމުގެ ދާއިރާއަށް ބޭނުންވާ ބަލްކް ކާގޯ ރާއްޖެއަށް އެންމެ ގިނައިން އެތެރެކުރަނީ އިންޑިއާ، އޮމާން އަދި ޔޫއޭއީ ފަދަ ޤައުމުތަކުންނެވެ. ހިލަޔާއި ހިލަވެލި އިންޑިއާއިން ގިނަ ޢަދަދަކަށް އެތެރެކުރާއިރު، ބަނދަރާއި ގޮނޑުދޮށް ޙިމާޔަތްކުރުމުގެ މަސައްކަތަށް ގިނަ ޢަދަދެއްގެ ބޮޑު ހިލަ އެތެރެކުރަނީ ޔޫއޭއީއިންނެވެ. އަދި ދަގަނޑާއި ސިމެންތި އަދި އެކި ބާވަތުގެ ކޮންސްޓްރަކްޝަން ކެމިކަލްވެސް ރާއްޖެއަށް އެތެރެކުރާ އެއް ސަރަޙައްދަކީ މެދުއިރުމައްޗެވެ.
މާލެއާއި އަތޮޅުތަކުގައި ކުރިއަށްދާ މަޝްރޫޢުތައް ހަލުވިކުރުމަށް ސަރުކާރުން ގެންދަނީ ގިނަ މަސައްކަތްތަކެއް ކުރިއަށްގެންދަމުންނެވެ. އެގޮތުން އެއްފަހަރާ ގިނަ މަޝްރޫޢުތަކެއް ފެށުމަށް، އެކަމަށް ބޭނުންވާ ހެވީ ވެހިކަލްއާއި މެޝިނަތީގެ ބޮޑު ބެޗެއް ރާއްޖެ ވަނީ ގެނެސްފައެވެ. އަދި އެ ތަކެތި އަތޮޅުތަކަށް ފޮނުވުމަށް ވަނީ ތައްޔާރުވެފައެވެ.
ކިޔުންތެރިންގެ ހިޔާލު