ނ. އަތޮޅުގައި ހިންގާ މަތީ ފަންތީގެ ރިސޯޓެއް ކަމަށްވާ ސޮނޭވާ ޖާނީގައި މިއަދު އަލިފާނުގެ ހާދިސާއެއް ހިނގައި، އަލިފާންގަނޑު ކޮންޓްރޯލް ކުރުމުގެ މަސައްކަތް އެމަޖެންސީ ޓީމުތަކުން ފަށައިފިއެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކާއި ވީޑިއޯތަކުން ފެންނަ ގޮތުގައި، އަލިފާންގަނޑު ވަނީ ރިސޯޓުގެ ބައެއް އޯވާވޯޓާ ވިލާތަކަށް ފެތުރިފައެވެ. އެ ސަރަހައްދުން ވަރަށް ބޯކޮށް ދުން އަރަމުންދާ މަންޒަރު ފެންނައިރު، އަލިފާނުގެ ސަބަބުން ލިބުނު ގެއްލުމުގެ ތަފްސީލެއް އަދި އެއްވެސް މީހަކަށް އަނިޔާއެއް ލިބިފައިވާ ކަމުގެ ރިޕޯޓެއް މިހާތަނަށް ލިބިފައެއް ނުވެއެވެ.
ފުލުހުން މައުލޫމާތު ދޭ ގޮތުގައި، އަލިފާނުގެ ހާދިސާގެ ރިޕޯޓު ލިބުމާއެކު ފުލުހުން ދަނީ އެ ސަރަހައްދުގައި ހަރަކާތްތެރިވަމުންނެވެ. އަދި އަލިފާންގަނޑު ކޮންޓްރޯލް ކުރުމުގެ މަސައްކަތް ހުއްޓުމެއްނެތި ކުރިއަށްދާކަމަށް ފުލުހުން ވަނީ ކަށަވަރުކޮށްދީފައެވެ.
އަލިފާން ނިއްވުމުގެ މަސައްކަތުގައި ފުލުހުންނާއި ސިފައިންގެ އިތުރުން ރިސޯޓްގެ މުވައްޒަފުން ވެސް ދަނީ ހަރަކާތްތެރިވަމުންނެވެ. އަލިފާންގަނޑު އިތުރަށް ފެތުރުނަ ނުދީ ކޮންޓްރޯލް ކުރުމަށް އަންނަނީ މަސައްކަތް ކުރަމުންނެވެ.
އަލިފާން ރޯވާން މެދުވެރިވި ސަބަބާއި ލިބުނު ގެއްލުމުގެ ފުރިހަމަ ތަފްސީލެއް ކަމާބެހޭ އިދާރާތަކުން އަދި ހާމަކޮށްފައެއް ނުވެއެވެ.
ކިޔުންތެރިންގެ ހިޔާލު