މީގެ 13 އަހަރު ކުރިން ކ. ކާށިދޫގައި ޑިއުޓީއަށް ނުކުމެ ހުއްޓައި ވަޅިއަކުން ހަމަލާދީ، ޕޮލިސް ސާޖަންޓް އާދަމް ހަލީމް މަރާލި މައްސަލައިގައި އެރަށު ސުވާސާގޭ މުހައްމަދު ސަމާހުގެ މައްޗަށް ކުރި ގަސްތުގައި މީހަކު މެރުމުގެ ކުށުގެ ދައުވާ އަނެއްކާވެސް ސާބިތުވެއްޖެ ކަމަށް މިއަދު އެ ކޯޓުން ކަނޑައަޅައިފި އެވެ.

މި ހާދިސާ ހިނގީ 23 ޖުލައި 2012ގައެވެ. ކުރިން ސަމާހުގެ މައްޗަށް ކުށް ސާބިތުވެ އޭނާ މަރަން ހުކުމްކޮށްފައި ވަނިކޮށް ސުޕްރީމް ކޯޓުން ވަނީ އެ މައްސަލަ އަލުން ބެލުމަށް އަންގާފައެވެ.

ސަމާހު މިހާރު ހުރީ ޝަރީއަތް ނިމެންދެން ބަންދުކޮށްފަ އެވެ.

ކްރިމިނަލް ކޯޓުން އެ މައްސަލަ އަލުން ބެލުމަށް ފަހު، ސަމާހުގެ މައްޗަށް ކޮށްފައިވާ، ގަސްތުގައި މީހަކު މެރުމުގެ ކުށުގެ ދައުވާ ސާބިތުވާ ކަމަށް މިއަދު ވަނީ ހުުކުމްކޮށްފައެވެ.

ދެން އޮންނާނީ ސަމާހުގެ މައްޗަށް އަދަބު ކަނޑައެޅުމަށްޓަކައި އާދަމް ހަލީމްގެ ވާރިސުންގެ ހެކިބަސް ނެގުމެވެ. އެ އަޑުއެހުން ކްރިމިނަލް ކޯޓުގައި ތާވަލްކޮށްފައިވަނީ އަންނަ ބުރާސްފަތި ދުވަހަށެވެ.