1447 ވަނަ އަހަރުގެ ފިޠުރު ޢީދު ދުވަހުގެ ޚުޠުބާގައި، މިއަދަކީ މާތް الله ދެއްވި ހިދާޔަތަށްޓަކައި އެކަލާނގެއަށް ޝުކުރުކޮށް، ތަކުބީރުގެ އަޑު އުފުލައި އުފާފާޅުކުރަންވީ ދުވަސްކަން ބަޔާންކޮށްފިއެވެ. މުސްލިމުންގެ ޢީދު ޒީނަތްތެރިކުރަންވީ ތަކުބީރުގެ މަތިވެރި ކަލިމަތަކުންކަން ޚުޠުބާގައި ފާހަގަކޮށްފައިވެއެވެ.
މުސްލިމުންގެ ޢީދަކީ އެއްބައިވަންތަކަމާއި، ކުޑަކުދިންނާއި ބޮޑެތިމީހުން އަދި އަންހެނުންނާއި ފިރިހެނުންގެ މެދުގައިވާ ގުޅުން ރަމްޒުކޮށްދޭ ދުވަހެއްކަމަށް ޚުޠުބާގައި ބަޔާންކުރިއެވެ. މީގެ އިތުރުން، ފަޤީރުންނާއި މުއްސަނދިންގެ މެދުގައި އޮންނަންޖެހޭ ރަޙުމަތްތެރިކަމާއި އޯގާތެރިކަން އިސްކުރުމަށް ވަނީ ގޮވާލާފައެވެ.
ޙަސަދަވެރިކަމާއި ބައިބައިވުމުން ދުރުހެލިވެ، އެކަކު އަނެކާގެ ޙައްޤުތައް އަދާކުރުމަށް ޚުޠުބާގައި ބާރުއަޅާފައިވެއެވެ. އެންމެ ފުރަތަމަ މާތް اللهގެ ޙައްޤުތައް އަދާކުރުމަށާއި، އެއަށްފަހު މައިންބަފައިންނަށް ހެޔޮކޮށް ހިތުމަށް ވަނީ އަމުރުކޮށްފައެވެ. އަދި ރަޙިމުގެ ގުޅުން ކެނޑިފައިވާ މީހާވެސް، އެ ގުޅުން އިސްވެ ގުޅުވުމަކީ މަތިވެރި ސިފައެއްކަން ކީރިތި ރަސޫލާގެ ޙަދީޘްފުޅުން ހަނދާންކޮށްދީފައިވެއެވެ.
ޚުޠުބާ ނިންމާލަމުން، ޢީދު ދުވަހަކީ އުފާވެރިކަން ފާޅުކުރަންވީ ދުވަހެއްކަމާއި، މުސްލިމް އަޚުންނާއި އުޚުތުންގެ މޫނުމަތިން އެ އުފާވެރިކަން ފެންނަންވާނެކަމަށް ބަޔާންކޮށްފައިވެއެވެ.
ކިޔުންތެރިންގެ ހިޔާލު